Pagbunok sa uwan

Gula 4

Samtang naglakaw sila si Renante ug Dorin niadtong gamay’ng dalan-dalan nahalingi sila tungod sa kahayag gikan sa ilang luyo. Nakurat si Renante pagkakita nga dunay kotse nga nagsunod kanila.

“Hala! Nganong duna may kotse dinhi nga wala man unta’y karsada ning dapita?” wala gayud makapugong si Renante sa pagpangutana.

Wala siya tubaga ni Dorin. Hinoon giguroy siya paingon sa kotse ug gibuksan ang pultahan. “Sigi sakay na Ren, anha ta lingkod sa luyong lingkoranan,” matud sa dalaga.

Midagan ang sakyanan. Walay tingog-tingog ang lalaki nga nagmaneho sa kotse. Nahibulong si Renante kay dili niya makita ang gawas nga bahin nga ilang giagian.

Taud-taud, nadungog niya nga mihunong ang kotse ug miserbato. Dayon midagan na usab kini. Mora’g misulod sila og gate sa usa ka balay dayon mihunong.

“Dia na ta Ren, manganaug na ta,” gibuksan ni Dorin ang pultahan sa kotse. Diha pa nakita ni Renante ang palibut. Usa ka matahum kaayong balay, hayag ug lainlain ang suga.

Wala magtingog si Renante kay sa iyang paminaw gikan sa pagsakay nila sa awto, wala sila makaabot og layo apan dia na siya karon sa nindot kaayo nga balay.

Dihang nanuroy sila si Agaw niya Joel ug Peping wala gayud siya makakita og daku ingon man nindot nga balay sa dapit sa iyang apohan.

“Ren, adto ta sa balkonahe sa taas maayo didto kay makita ang kinaubsan. Malingaw ka didto nga magtan-aw. Ayaw na liboga pa ang imong huna-huna kun hain ka karon,” matud ni Dorin.

Wala makapugong si Renante. “Kanindot ning lugara Dorin. Apan wala pa gayud ko makasabut nganong dunay awto nga atong nasakyan nga dia man kita sa bukid? Gisuroy namo ang dapit sa akong apohan kaganinang buntag apan wala kami nakitang dakung balay Dorin.”

“Tug-anan ko unya ikaw Ren kun ngano. Tana pakit-on ko ikaw sa akong lawak kun makauyon ka ba,” matud ni Dorin.

Gibuksan ni Dorin kadtong pultahan nga dunay mga dayan-dayan ug nanulod sila. Hilabihan ka tahum ang maong lawak. Daw wala gayud mahimutang si Renante.

Gigakus siya ni Dorin ug maoy nakasugnib kanila og kainit. Nag-ukobay dayon ang ilang mga ngabil. Sa makausa pa, nagdakpanay ang ilang mga dila didto sa ilawom samtang nagsugod na og pagpanghiram ang mga kamot ni Renante sa kalawasan sa dalaga.

Bongga na karon ang ilang pagromansa ning higayona kay nahuna-huna nila nga wala nay laing tawo nga makakita sa ilang pagabuhaton. (Sumpayan pa)