Kaniadto sa mga Macau pa ang midala sa kasino, uso kaayo ang mga empleyado ituyok sa pagdestino sa nagkalainlaing branch. Bag-o pa lang gani kaming nakatrabaho isip card dealers, gidestino gilayon among batch sa Davao. Una kadto namong pagsakay og ayroplano.
Sa didto na kami sa itaas, gibati og kaihion si Igi, akong kauban nga tupad nakog lingkod. Mao nga nagdali siyang miadto sa CR. Apan nahibulong ko nganong dugay siyang nakabalik. May nahitabo kaha niya? Nakita ra ba nako nga naglaray nagsugod ang pipila ka pasahero duol sa kasilyas, kinsa gusto pod nga mogamit. "Nganong wala pa kaha si Igi makagula, no?" Gikulbaan ko.
Taudtaod, may flight stewardess nga midaitol sa iyang dalunggan sa pultahan sa CR. Ingon sa dunay gipaminaw. Unya dunay gihiram-pindot sa bungbong hangtod nga naabli ang palid. Ug maoy misugat sa akong panan-aw si Igi nga minghoy kaayo ang nawong nga migawas.
"Nganong nadugay man ka didto sa sulod, Gi? Uy, nganong gisingot man ka pag-ayo nga bugnaw man unta ning ayroplano?" Nako pa nga nauknol ug naintriga.
"Pwerting kuyawa nako didto sa sulod, Jav." Hinay'ng bukas sa iyang baba nga kakataw-onon.
"Ngano man?" Medyo nainat akong kilay nga mitan-aw ni Igi.
"Wa na ko katultol sa pultahan sa kasilyas. Lahi man siya sa ordinaryong CR. Kay walay seradora nga maliso. Natagbaw kog pangita asa kini? Wa gyod koy nakit-an. Naay mga buttons. Pero hadlok kong mopislit. Kay simbako uroy'g 'EJECT' akong mapindotan, malabay ko sa kahanginan. Mao tong gituktok na lang nako’g maayo ang bungbong dungan ang pagsiyagit: "Ablihi kooo!!! Ablihi kooo!!!"
"Mao ba?" Ako nga nakabati sa asoy ni Igi, nakuyawan na lang sab. Kaihion sab ra ba unta ko. Aw, ako na lang gipugngan pag-ayo nga dili mahibos. Ug dinha na pag-abot namo sa airport gibuhos nako tanang pag-antos. Kasinatian sa unang pagsakay'g ayroplano nga di namo malimtan. (Katapusan)