Walay kamatayon ang gugma

GULA 94

Gi-reformat ni Jody ang maong pamantalaan. Gipalig-on niya ang marketing niini sama sa iyang gihimo sa Cebu Standard. Gipanindot usab niya ang sulod sa pamantalaan. Mi-hire siya’g dugang mga kolumnista ug koresponsal.

Ubos sa pagdumala ni Jody, inanay nga mikusog pagbalik ang sirkulasyon sa Mozart News.

Tangkod nang lima ka tuig ang Standard Publications nga nagpatik sa Cebu Standard ug Mozart News sa dihang namatay si Mr. Salvador sa sakit nga kanser sa tutunlan. Gikaguol pag-ayo ni Jody ang kamatayon sa iyang bana nga nagbilin kaniya’g handomanan nga usa ka anak. Ang pagpanaw ni Mr. Salvador sa laing kalibotan nagbilin kang Jody og masakit nga kahaw-ang.

Gumikan sa pagtaliwan ni Mr. Salvador, si Jody na ang nangunay pagdumala sa tanang mga negosyo nga gibilin niini kaniya. Miluwat siya pagka-editor sa Cebu Standard ug Mozart News aron may panahon na siya sa pag-atiman sa ubang mga negosyo sa namatay niyang bana.

Mikuha siya’g kasaligan nga maoy makapuli niya isip editor-in-chief ug sa samang higayon mao usay mobarog nga publisher sa Mozart News ug Cebu Standard. Gi-pirate niya si Jasmine gikan sa Silver Star Daily. Dako ang iyang pagsalig kang Jasmine. Nakugang si Jasmine pagkasayod nga siya diay ang tag-iya sa Standard Publications. Gipasabot ni Jody si Jasmine sa lintunganay nga hinungdan kun nganong gililong niya ang maong kamatuoran. -- Sumpayan pa