Sinugatan

Biyernes. Alas dose sa udto. Nibagting ang telepono ibabaw sa lamesita sa sala sa balay ni Edward Cuenca. Nangandam siya og igsusulti. Kay kun si Noel gihapon ni nga mangimbitar sa birthday party sa ilang igsoon nga si Byron, kasab-an gyud niya si Noel. Gipunit ni Edward ang telepono.

Sa niaging Miyerkules sa gabii, nitawag si Noel. Si Marivel kapikas ni Edward, ang nakatubag.

"Hello" ni Marivel.

"Nang Marivel. Di ba mo moari sa birthday ni Byron? ni Noel manghod ni Edward. Tulo man sila ka managsoon. Kamanghoran si Noel. Tungatunga si Byron.

"Di ba karon mang Biyernes? Tingtrabaho?" ni Marivel.

"O. Karon gong Hulyo 16" ni Noel.

"Duna may meeting sa Maritrans Engineering si Manoy Edward nimo" ni Marivel.

"Ah mao ba? Sige na lang" ni Noel. Gibutang ang telepono. "Kinsa tong nanawag?" ni Edward nga katupad ni Marivel sa sopa samtang nagtan-aw og telenobela.

"Si Noel. Nangimbitar sa birthday ni Byron" ni Marivel.

"Nganong siya may mangimbitar?" ni Edward. Naisang kilay. Wa nitingog si Marivel. Nipadayon sa pagtan-aw sa TV.

Mechanical Engineer si Edward. Manedyer siya sa Maritrans Engineering nga may buhatan sa Subangdaku, Mandaue. Nagpuyo siya sa Tibon Subdivision sa Talamban. Iyang mga manghod, kay ulitawo pa man, tua sa ilang ancestral home sa lungsod sa Sibundoy amihanang Sugbo.

Si Byron usa ka Accountant. Duha ka tuig nga nagtrabaho sa usa ka kompanya sa Qatar. Sa wa pa siya nakalarga nipuyo kadiyot sa ilang Edward. Duha ra siya ka buwan didto. Gikasab-an ug gihinginlan ni Edward. Kay sobra ka palikero. Di makontentog usa ka babaye. Tagurha ngadto’s tulo ka babaye iyang dad-on sa balay ni Edward. Iatol niyag weekends nga nangaligo’g dagat si Edward ug Marivel. Silingan ang nitaho nila mahitungod sa binuhatan ni Byron.

Matud ni Noel, kay siya may magtawagan ni Edward, gisugat ni Noel si Byron sa airport niadtong Martes sa hapon. Ang Toyota Revo ilang gisakyan, nga pinalit sa retirement benefits sa ilang Papa Wilben ug Mama Norelyn nga puro magtutudlo sa saring publiko. Si Noel ang gipaboran sa managsoon nga maoy mopuyo sa ilang ancestral home human namatay sa komplikasyon sa diabetes ilang ginikanan. Si Noel say nibanos ug dumala sa negosyong nabiyaan sa ilang ginikanan, nga general merchandising. May mga apo na si Edward. Naminyo na iyang duha ka anak puro lalaki nga puro Arketekto.

"Maayo ra man sag di ta muadto anang iyang birthday. Kay makagasto man ta" ni Marivel.

"Mao lagi. Imbitahon tuod ta. Unya padalhon ta’g regalo nga ice cream ug fried chicken. Mobungat man gyud!" ni Edward.

"Sa atong mga birthday, kun moanha siya, maghayon lang. Daghan pang kuyog nga mga barkada!" ni Marivel. Nangyamiid. Nangawot sa ulo si Edward.

"Hello!" ni Edward. Gihugtan og gunit ang telepono sa walang kamot.

"Maayong udto diha Manoy Edward" tingog ni Byron. Madasigon og tuno. Nakalitan si Edward.

"Happy birthday! Kumusta na man ka?" ni Edward nga hilaw ang tunada. Wa magdahum nga motawag gyud si Byron niya.

"Akong iuktaba ang selebrasyon sa akong ika-40 nga birthday. Kay naa koy sinugatan para nimo. Arimo mo tibook pamilya sa Sabado. Ugma. Dad-a akong mga pag-umangkon. Sila si Allan, iyang asawa nga si Mary Jane ug apo nimo nga si Jover. Si Efren, iyang asawa nga si Mary Grace ug apo nimo nga si Ritche," ni Byron. Malipayon iyang tunada. Saya ug may kahinangop. Wa katingog dayon si Edward.

"Ari baya gyud Manoy. Akong iatol og Sabado aron way rason nga di mo kaari. Di man na working day. Mahiubos gyud ko kun di mo moari!' dugang ni Byron.

"Sige. Ok.OK. Moanha mi ni Edward. Natandog iyang kasingkasing alang sa iyang manghod. Niginhawa siyag lawom. Hapit manglugmaw iyang luha. Gikalimtan na gyud diay ni Byron ang nanglabay. Igsoon gyud.

"Magpaabot ko Manoy. Salamat," ni Byron. Klik. (Katapusan)