Samtang nangahoy si Teroy sa may kakahoyan ibabaw sa bungtod may nasiklapan siyang usa ka butang nga mora’g migilak dihang naigo kini sa bidlisiw sa adlaw. Midali siya pagduol diin dunay daghang mga layang sanga sa kahoy nga nagyungyong.
Ug nahasibog siya, iyang nakita kay usa man kini ka motorsiklo nga bag-ong modelo karong panahona. Kinsa kaha kining motorsiklo? Nganong nahiabot man kini dinhi sa mamingaw nga kakahoyan sa bungtod?
Mao kini ang mga pangutana nga midugkal sa iyang kaisipan. Wala dayon siya maglangan, iya dayong gihiling ang maong motorsiklo ug may nakita siyang usa ka bolsita nga mora’g dunay sulod. Iyang gikuha ug gihuho ang sulod ug nahasiga na usab ang iyang mga mata kay mora’g usa man kini ka kapa nga itom.
Nganong duna may kapa dinhi? Kauban kaha kini sa motorsiklo? Ug kay nadani usab si Teroy sa kaanindot sa bag-ong motorsiklo nakahukom siyang iyang hilumon og dala kini ngadto sa ila. Himuon niya kini inig tikyop sa kilomkilom aron way makakita sa iyang pagdala niini.
Tuod, sa didto na siya sa ilang balay, iya dayong gipahiluna sa ilawom sa ilang silong ang motorsiklo. Kun wala’y mangita niining motorsikloha sulod sa usa ka semana mahimo na niya kining angkunon, ni Teroy pa sa hilom.
Pagtangka niya sa kusina diha na sila si Nanay niya Ditas ug si Tatay niya Pilong ug duha niya ka mga manghod nga lalaki ug babaye. Midungan na lang pud siya sa pagpanihapon kanila. Nianang pagka-buntag sayo.
“Teroyyyyy! Teroyyyy! Marika ra, dali dayonnnn!” kusog ang tingog sa iyang tatay Pilong nga mitawag kaniya. Midali siya’g kanaog sa silong.
“Ngano, Tay?” tubag niya dihang diha na siya sa tugkaran.
“K-kinsa ning motor? ha! Kaanindot ini, bag-o pa gyud kaayo!” ni tatay pa niya Pilong nga nahikurat sa nasaksihan niini nga bag-ong motorsiklo nga diha ibutang ilawom sa silong.
“Ako nang nakit-an didto sa may kakahoyan sa bungtod,” Tay,” ni Teroy pa. “Ako na lang nang gidala dinhi sa ato...”
“Sus, Ginoo, kun pangitaon ni sa tag-iya, kadelikado, basin og pasanginlan ka nga imong gikawat, ha! Hala, iuli ni didto sa gikuhaan nimo, karon dayon...” Midiyong ang mga mata sa iyang tatay. Mahilig og motorsiklo ang iyang amahan. Duna kini motor apan gibaligya lang og barato kay lagi mo-down og bag-o, apan aron mora’g naglibog ang hunahuna sa iyang tatay Pilong nga nagpunay’g tutok sa bag-ong motorsiklo ug unya nagpitokpitok ang mga mata.
Iyang gipasabot ang iyang tatay Pilong nga kun walay mangita sulod sa usa ka semana mahimong ilang angkonon, kana pay mopalit og bag-o pinaagi sa data-data ug unya dugay kaayong maimpas.
Nakasabot ang iyang tatay apan mora’g nagduda pa. Tuod, milabay na lang ang duha ka semana apan wala gyu’y nangita niini. Busa, ila na lang kining gigamit, gihimong habalhabal. Kusog kaayong modagan ang motor ug giganahan si tatay niya Pilong sa higayon nga sakyan kini niya. Unya, usa ka hapon may usa ka batan-on nga nangayog katahoran. Mitambo dayon si Teroy sa bentana.
“Mao ning balay ni Teroy?” niini pa. “Susama ra’g panuigon ni Teroy ang batan-on.
“O, mao ni, ug ako si Teroy,” dali niyang tubag.
“Nia lagi ko, kay magkuha ko sa motor ug sa kapa. Niabot na man gud ang akong papa gikan sa Englatiera ug gipangita niya ang iyang motor nga akong nabiyaan didto sa kakahoyan sa bungtod,” sa batan-on pa nga naghangad sa bentana.
“Balik lang unya karong gabii kay gigamit man ni Tatay Pilong ang motor,” ni Teroy pa. “Balik lang, ha, Bay...”
Miyango ang batan-on. Dayon milakaw kini.
Dihang namalik ang amahan ug anak giuli nila ang motorsiklo ug ang kapa. Apan wala dawata sa amahan ang kapa nga itom.
“No, dili ko kana madawat og balik. Inyo na kana, anha na kana ninyo!” Ug mibulhot dayon sa pagpadagan sa motorsiklo ang amahan diin sa likod niya nag-angkas ang anak. Pagka-gabii sa adlaw’ng Biyernes gisuwayan og sul-ob ni tatay niya Pilong ang kapa ug kalit lang nausab ang iyang nawong, nahimo siyang usa ka matang nga ungo ug unya kusog kaayo kining nagwakwak, “Wakkkk! Wakkkkkkkk! Wakkkkkkk!”
“Tayyy, usa ka na ka ungooo, tungod anang kapa nga imong gisul-obbbb! Ungoooo! Ungoooooo naaaa si Tatayyyyy Pilonggggg!” Ug midagan si Teroy. (Kataposan)