Walay kamatayon ang gugma

Nakombinser si Mr. Salvador sa iyang gisulti ug misugot kini sa iyang plano.

Human mahan-ay ang tanang plano, gipagawas gilayon ni Jody ang maiden issue sa Cebu Standard. Si Mr. Salvador maoy mibarog nga publisher. Si Jody mismo ang editor-in-chief sa pamantalaan. Apan wala niya ibutang ang matuod niyang ngalan sa editorial box. Nag-pen name siya og Sarah Sinderella. Dili siya buot nga madayag ngadto sa ilang mga kakompetensiya sa industriya nga siya maoy editor sa Cebu Standard.

Lakip ang tanang sakop sa board of editors, reports, correspondents, columnist ug ang tanang mga empleyado sa publikasyon iyang gibaoran nga dili gayod motug-an ngadto ni bisan kinsa nga siya ang editor sa Cebu Standard. Gipasabot sila ni Jody nga mao kini ang ilang estratehiya sa pagpalambo sa ilang pamantalaan. Misabot niini ang mga empleyado.

Maayo ang dagan sa Cebu Standard bisan bag-o pa kini sa sirkulasyon. Gihangop ang maong pamantalaan sa masa. Nindot man gud ang sulod niini. Gigamit gayod ni Jody ang tanan niyang nakat-onan bahin sa journalism ug ang iyang kasinatian sa pameryodiko sa nagtrabaho pa siya sa Silver Star Daily. Natay-og ang ubang mga pamantalaan sa kalit nga pagsulbong sa popularidad sa Cebu Standard. Maayo ang resulta sa ilang sales. Daghan na usab sila’g mga advertisers. -- Sumpayan pa