Anino sa adlaw

Gula 73

“Destroy them all kun gikinahanglan,” tugon ni Andam.

Tuod man, gituman sa grupo ni Maj. Moral ang plano. Alas onse ang takna sa kabuntagon nagpaduol na sila sa gikampohan sa mga rebelde. Giseguro nila’g sikop ang usa ka mag-uuma nga gituohan nilang informer sa mga rebelde aron walay makapaabot og kasayoran ngadto ni Kumander Abay mahitungod sa ilang pagsulong.

Gisirkulohan nila ang kampo sa mga rebelde. Ug paghagtok gyud sa alas dose nga takna sa kaudtohon, miatake sila ni Maj. Moral ug mga kauban. Mipaka ang mga butobuto sa mga armas nga tag-as og kalibre. Misukol kanila ang mga rebelde. Nangabot usab dayon ang back-up sa mga sundalo nga duha ka tangke de giyera. Ug sa kahanginan, misugod dayon paglusak ang usa ka helicopter.

Naapiki ang mga rebelde tungod kay wala sila makabantay ug maayong pagkaplano ang pag-atake sa mga militar. Daghan na ang napatay nga mga sakop ni Kumander Abay.

Nagpadayon sa paghimo’g opensiba ang mga sakop sa militar. Ang kauban kanila nakapuwesto nag maayo maong wala gayoy dag-anan kanila sa panagsangka ang mga rebelde. Lanog nga mga butobuto ang mabati sa palibot nga sa matag karon ug unya sapawan sa mga agulo sa kasakit ug tig-ik sa kamatayon. -- Taposon sunod gula