Walay kamatayon ang gugma

Gula 90

Nakugang si Jody usa ka buntag niana sa iyang pagtan-aw sa Mozart News, ang pamantalaan nga gipatik sa kaugalingong publikasyon sa namatay niyang amahan. Bag-o na ang dagway niini. Gibag-o ang masthead. Mora’g gi-reformat.

Gisugdan niya’g pakli ang pamantalaan. Pag-abot niya sa opinion page, mihunong siya pagpakli. Gitamdan niya ang editorial box. Iyang nasuta nga bag-o na ang ngalan sa publikasyon. Dili na ang Mozart Publications maoy nagpatik sa Mozart News kundili ang Broadway Publications na. Ug si Randy Maglana mao nay publisher niini.

Nakahinuktok si Jody sa maong kasayoran. Dihay laraw nga natibuok sa iyang hunahuna. Ug ang maong laraw iyang gipadayag ngadto kang Mr. Salvador sa ilang panag-abot sa balay nianang pagkahapon.

“Magpublikar ta’g newspaper,” niya pa.

“U-unsa?” Daw nakugang si Mr. Salvador, ingon sa wala magdahom nga mao kadtoy iyang isulti. ” Makasugakod kaha ta sa tulo ka local dailies dinhi sa ato nga established na man sila.”

“Dili kana problema,” pasalig ni Jody. “Akoy mangunay. Nalimot ka nga usa ako ka journalist? Gawas pa, may kaugalingon kitang printing press.” -- Sumpayan pa