Anino sa adlaw

Gula 72

May napulo ka sakop sa walhong pundok nga nangabot sa kampo ni Kumander Abay. Gikan sila sa kampo ni Kumander Luthang nga naglihok sa kabukiran sa silingang lalawigan. Gipadala sila ni Kumander Luthang ngadto sa kampo ni Kumander Abay aron pagpalig-on og maayo sa pundok sa naulahi.

Nalipay si Ronald nga nadugangan og mga tawo ang ilang pundok. Mao usab si Kumander Abay. Ang napulo ka tawo nga nahidugang sa ilang pundok dako na kaayo’g ikatabang sa pagpadayon nila sa ilang kawsa. Alang nila, mora kini’g blessing in disguise kay ang pagbiya ni Ka Martin kanila gitugbangan man og napulo ka tawo nga makatabang pagpalig-on sa ilang puwersa sa kabukiran.

Sa laing bahin, nakadawat ang militar og kasayoran gikan sa intelligence network nga nagbutyag kun hain maglublob ang grupo ni Kumander Abay. Nag-umol dayon si Lt. Col. Jeffrey Andam og unit nga maoy iyang tahasan sa pagpahigayon og opensiba. Si Major Jack Moral maoy iyang gitudlo sa pagpangulo sa maong unit.

Iyang gipresentar ngadto sa grupo ni Moral ang mapa sa dapit nga gikampohan sa pundok ni Kumander Abay. Base sa plano, iatol nila ang pag-atake sa kampo sa mga rebelde sa udtong tutok. Mo-back up kanila ang duha ka tangke de giyera ug usa ka helicopter. May i-reinforce pa gyud nga laing helicopter kun gikinahanglan. -- Sumpayan pa