Way aso nga makumkom

Si Ryan ang mimaneho sa ilang bag-ong kotse, kuyog ang iyang asawa nga si Adelfa. Pag-abot sa katedral, misulod sila sa kinoral nga parke niini, aron iparking ang sakyanan. Nanglakaw na lang sila subay sa aseras kay duna silay pamaliton.

"Kaayo bang yatakan ning mga bataa," ni Ryan kay nahasul sa paglakaw gumikan sa mga nangligdas sa agi-anan.

"Ayaw pag-iningon ana, uy! Sahi ra ba kun imo kanang anak, malipay ka kaha, kun patiran o yatakan na sa ubang tawo?"

Nahimut-okan si Ryan sa gisulti kaniya sa asawa. Dugay na sila nga way anak. Nahinumdom siya sa katabang nga iyang gi-anakan.

"Di ko gustong maabtan kita sa asawa mo nga ingon niani ang akong kahimtang. Nasayud kong mouli siya karong sunod semana." Mibakho kining mikugos sa masuso," mopahawa ko nga kauban ang akong anak," dayong talikod kang Ryan nga morag kandila nga giugbok.

Nahipugwat sa pamalandong si Ryan sa dihang gikablit kini sa asawa aron ipa-alsa na ang mga kinumpra. Gisuhid niya pag-ayo ang mga kinumpra basin may mataligam-an. "Oh! Kang kinsa man ning mga senina sa bata."

"Ayaw lang paglangas diha, gi-andam ko kana alang sa atong umaabot nga anak." Mipahiyum kining mitan-aw kang Ryan.

"Tingali'g may gitagoan ang asawa ko samtang didto kini magtrabaho sa Canada." Duda pa niya.

Nakarga na sa kotse ang tanang kinumpra nila. Mihapit una silag panagkot og dayon mipahaguros sa pagpadagan.

"Paghinay lang Ryan, naa rabay mokalit lang og labang."

Wa gyud magnuod ang baba sa asawa, kay pag-abot sa unahan, may nadasmagan silang babaye nga may gigunitang bata.

"Pagdali Ryan, sabwata dayon ug isakay sa kotse kay atong dad-on sa ospital." Natarantar ang magtiayon.

Pag-abot sa ospital, giatiman dayon ang pasyente. Pagkahuman misulod sila sa lawak niini.

"Inday, ikaw? Di ba gi-ingnan ko ikaw nga di molakaw sa balay."

"Nasayud ka na diay ning tanan, Adelfa? Pasayloa ako,kay wa gyud ko kaantus sa kamingaw dihang nahilayo ka kanako."

"Sigi Inday, iniggawas mo dinhi adto na kamo mopuyo sa balay," ni Adelfa nga malipayong mihapuhap sa bata. (Kataposan)