Pauli kun diin gikan

CEBU, Philippines - Cebu City Morag napawong ang panan-aw ni Lorrie dihang mipaka ang iyang aping sa kusog nga tamparos. Nabarag siya ug kun wa pa siya makahawid sa nagsuyla nga kahoy sa ilang kuwarto, seguradong matumba siya.

"Ayaw kog pabut-i sa gusto kong buhaton, ha? Buysit kang bayhana ka!" Nagpangumo si Roman, misiga ang mga mata sa kasuko, nga nagtindog sa atubangan ni Lorrie. Kaadlawon na, pero mao pay pag-abot ni Roman.

"Nganong managpa ka man dayon, Roman? Nangutana lang ko nimo kun nganong karon ka pa mopauli!" Midanguyngoy si Lorrie nga nagpanghikap sa iyang aping.

"Ah, wa kay labot kun diin ko gikan!" Misinggaak si Roman. Nagdali siyang mikanaog pagbalik sa giabangan nga daang balay nga morag gubaon na sa usa ka eskuwater sa siyudad.

Milingkod si Lorrie sa ngilit sa katre. Mibakho na gyod siya. Puwerte niyang pagbasol nga nagtuman siya sa iyang gusto. Tungod sa dako niyang pagmahal kang Roman, gisupak niya ang gusto sa iyang mga ginikanan. Gikaila niya si Roman sa kanunay niyang pag-adto sa unibersidad nga iyang gieskuylahan, ug ingon man sa iyang pagpauli sa Labangon.

Konduktor si Roman sa suki niyang dyip depasaheroan nga maoy kanunay niyang sakyan. Guwapo ug dunay hustong gitas-on si Roman. Puparehas niyag edad, mga desisyete anyos. Nagkahinigugmaay sila. Nawad-an siyag kontrol sa iyang kaugalingon, ang pinitik sa kasingkasing maoy nagpasulabi.

"Unsay makuha nimo anang konduktor? I-among nimo ang maayo nimong kaugmaon?"

Isog si Noy Fidel, amahan ni Lorrie.

"Ayaw pagpakabuang, Lorrie! Naninguha kami si papa nimo aron makahuman kag kurso unya nanguyab ka na og usa ka konduktor pa gyod?"

Hapit na lang tulisoka ni Nang Lagring si Lorrie.

Nahinumdom si Lorrie sa mga pulong sa iyang mga ginikanan. Pero wa siya maminaw. Nagtuman gyod siya sa iyang gusto. Nakigtaban siya kang Roman. Nagtuo siya nga buotan kini. Nag-antos siya sa kabaho sa eskuwater nga ilang gipuy-an tungod sa pagtuo nga tinuod gyod siyang gimahal ni Roman. Pero iresponsable diay kini. Sugarol, palahubog ug himabaye pa gyod.

Kasagaran, buntag nang mopauli, sama karon. Mihuot ang dughan ni Lorie nga naghunahuna sa kagahi sa iyang ulo. Miundang siya sa pag-eskuyla tungod kang Roman.

Bisag kapoy ang lawas kay talianak na siya, walo ka buwan na ang iyang gimabdos, nanglaba gihapon siya sa mga bulingon ni Roman. Wa sila makasal kay kuwang pa sila sa edad. Hayag na kaayo ang kabuntagon.

"Lorrie! Lorrie!" Naghangos si Liza nga miduol kang Lorrie.

Gikulbaan si Lorrie. Giatubang niya ang silingan ug suod niyang amiga. "Naunsa ka, Liz?"

"Sus, si Roman nadakpan sa mga polis. Pusher man diay sa shabu ang imong gikapuyo, Lorrie. Tua, nagtingkagol na sa presohan apil ang duha niya ka kauban."

Wa makatingog si Lorrie. Pero inay mohilak siya, nabatyagan niya nga morag dunay daghang mga tunok nga naibot sa iyang dughan. Nakaginhawa siya og luag.

Niadtong buntaga, nanghipos si Lorrie. Gidala niya ang tanan niyang biste. Mopauli siya. Mangayo’g pasaylo sa iyang mga ginikanan. Ug kun pasayloon siya, nakasaad siya sa iyang kaugalingon nga usa ka tul-id nga dalan na ang iyang subayon sa pagpakabuhi. (Kataposan)