Walay kamatayon ang gugma

Gula 86

“Honey...”

Nahagakos si Jody kang Mr. Salvador. May mga luha nga mitubod sa iyang mga mata.

Pagsulod ni Jody sa iyang buhatan, sama sa naandan, maoy una niyang giukay ang inadlaw’ng pamantalaan nga diha sa iyang talad-buhatan. May kopya gayod siya sa Silver Star Daily, Mozart News ug Freedom News adlaw’ng tanan.

Importante man gud niya ang pagsunod sa mga panghitabo sa nasud ug sa tibuok kalibotan. Bisan wala na siya magtrabaho karon sa media apan wala pa gayod mawagtang ang iyang hilig sa journalism. Maoy paborito niyang basahon ang banner news story sa pamantalaan, mga balita sa patigayon ug ang mga lindog nga gisulat sa inilang mga kolumnista sa Sugbo.

Maoy una niyang gibasa ang Silver Star Daily. Iyang gibasa ang column ni Jasmine nga mao nay mipuli kaniya isip opinion editor sa pamantalaan. Human niya mabasa ang lindog niini, iyang gitikyop ang pamantalaan.

Maoy gisunod niya’g basa ang Mozart News, laing inadlaw’ng pamantalaan sa dakbayan sa Sugbo nga gipatik sa Mozart Publications nga gipanag-iya sa iyang amahan. Pero nakugang siya pagkabasa sa umbrella headline niini nga. “Mozart Publications Publisher Dies, 64.” Ang estorya sa maong news item atua sa ikaduhang panid. -- Sumpayan pa