Walay kamatayon ang gugma

Gula 84

Usa ka buotan nga bana ug amahan si Mr. Salvador. Wala siya magmahay nga iya kining gipakaslan bisan kun dako kaayo ang gintang sa ilang pangedaron. Tungod sa kabuotan niini, nakakat-on si Jody sa paghigugma niini sa kadugayan.

Pinangga ni Mr. Salvador si Lovi, ang ilang anak. Kaha tungod kay wala kini anak sa unang asawa niini, natingob ang pagmahal ni Mr. Salvador ngadto sa ilang anak. Bisan sa ka-busy niini sa daghang negosyo nga giatiman, may panahon pa gayod kini alang kanilang asawa ug anak.

Nahikalimot na si Jody sa masakit nga mga panghitabo sa iyang kinabuhi. Ang pagsugod niya sa bag-ong kinabuhi nahingpit gumikan kang Mr. Salvador nga maoy nagbangon kaniya gikan sa pagkahilukapa.

“Dawata kini,” nagkanayon si Mr. Salvador usa ka higayon niana sa paghiuli niini gikan sa opisina.

May gitunol kini kaniyang folder nga nag-amping sa mahinungdanong mga dokumento ug ubang mga papeles.

“Unsa man kini?” Sukit ni Jody dayong dawat sa folder.

“Gipahikay ko na sa akong abogado ang pagbalhin sa titulo sa akong mga propiyedad nganha sa imong ngalan,” matud ni Mr. Salvador. “Ikaw nay bahalang motipig niana.”-- Sumpayan pa