Walay kamatayon ang gugma

Gula 82

Nakasabot si Mr. Salvador sa nahitabo kaniya. Wala niini igsapayan ang iyang kagahapon. Tungod niini, nakahukom si Jody pagdawat sa gugmang gihalad niini kaniya.

Alegre ang kasal nila Jody ug Mr.Enrique Salvador nga gipahigayon sa Sto. Rosario Church. Gitambongan kini sa mga kaila ug higala ni Mr. Salvador nga ang kadaghanan mga tinamod sa katilingban.

Ang reception didto gipahigayon sa Water Front Hotel. Alegre kaayo ang panaghudyaka sa mga nanambong.

Malipayon kaayo si Jody. Sa hun-ag sa iyang panagway, dili na masihag ang grabeng trahedya nga nahitabo sa iyang kinabuhi. Lunsay nga kamaya ang gilila sa iyang pamayhon.

Human sa salo-salo, nagpahatod sila Jody ug Mr. Salvador ngadto sa airport sa Mactan. Na-schedule na ang ilang flight paingon sa Baguio diin adto sila mag-honeymoon sulod sa duha ka semana.

Buntag sayo. Maoy namat-an ni Jody ang paglain sa iyang kutokuto. Mibangon siya’g hinay aron dili matugaw si Mr. Enrique Salvador nga natulog pa sa iyang tupad. Midagan siya paingon sa banyo nga diha ra sab sa sulod sa ilang lawak kay lain kaayo ang pamatyag niya sa iyang ginhawaan. -- Sumpayan pa