Walay kamatayon ang gugma

Gula 80

Apan iya lang usab dayon nga iwakli sila sa iyang hunahuna. Pangutan-on niya ang iyang kaugalingon. Naghandom usab kaha sila kanako karon? Sa maong kahimtang, makaingon siya sa iyang kaugalingon nga dili na siya angay pang maghandom kanila.

Gitingob niya ang iyang panahon sa pagdumala sa printing press ni Mr. Salvador. Sa iyang pagdumala, misamot ang kahapsay sa dagan sa kompaniya.

Miabot ang panahon nga wala damha ni Jody. Birthday kadto niya. Gihatagan siya ni Mr. Enrique Salvador og birthday party nga gipahigayon sa buhatan sa kompaniya niini. Alegre ang okasyon nga gitambongan sa tanang mga empleyado.

Nakahigayon si Mr. Salvador sa pagpadayag sa gibati niini kaniya. Wala magdahom si Jody nga mangulitawo kaniya ang lagas.

“Nasayod kong hilasan ka, Hija,” nagkanayon si Mr. Salvador. “Tungod kay dako kaayo ang gintang sa atong pangedaron. Apan dili man tingali daotan ang akong proposal? Biyudo ko ug walay anak. Sa laktod, wala koy kabilinggan sa kinabuhi. Kining ako dili pag-take advantage. Tinud-anay ning ako.” -- Sumpayan pa