Anino sa adlaw

Gula 61

“Supak sa balaod ang buot ninyong buhaton, Ronald,” nagkanayon si Ricky. “Labot pa, makadugang lang kini sa inyong tulubagon sa balaod.”

“Ang balaod sa patag wala maglihok, Manoy,” matud ni Ronald. “Busa ang among balaod dinhi sa bukid maoy among palihokon aron pagputol sa sungay sa mga daotan.”

Naputol ang iyang panagsulti dihang miduol kanila si Ka Martin aron pagpahibalo kanila nga andam na ang pamahaw. Samtang nangaon, gipahibalo siya ni Kumander Abay nga inigkagabii ihatod na siya’g balik sa mga sakop niini ngadto sa patag.

Gipahimuslan ni Ricky ang pagpangobserbar sa kalihokan sa mga rebelde sa bukid. Nasuta niya nga dili sayon ang ilang kahimtang. Nakadayeg siya sa sakripisyo sa mga sakop sa walhong grupo. Tungod sa ideyolihiya, nag-antos sila sa kalisod. Wala silay tarong mga pinuy-anan sa bukid. Daginoton ang pagkaon. Ang uban may kabilinggan sa lawas. Apan miantos sila tungod sa gibarogan nilang kawsa.

Pagtikyop sa kagabhion, migikan si Ricky uban ang unom ka sakop sa walhong pundok paingon sa patag. Gitaptapan gihapon ang iyang mga mata ug gialalayan lang siya sa paglakaw sa duha ka mga rebelde nga iyang kuyog. Pag-abot nila sa patag, gikuha sa mga rebelde ang panyo nga gitaptap sa iyang mga mata. -- Sumpayan pa