Gula 60
“Igo na tingali nga may usa sa among pamilya nga nahimong sakop sa inyong kalihokan,” nagkanayon si Ricky nga ang gipasabot mao ang iyang manghod nga si Ronald.
“Akong girespetuhan ang imong hukom, Ricky Liwanag,” sa Kumander pa. “Pero kun ugaling mausab ang imong hunahuna, andam kami pagdawat kanimo sa tanang panahon.”
Hapit na ang kabuntagon dihang nahuman ang panagsulti nila ni Ricky ug Kumander Abay. Diha na siya natulog sa payag sa Kumander sa mga rebelde.
Taas na ang gintang sa adlaw didto sa sidlakan dihang nahigmata si Ricky. Wala na sa payag si Kumander Abay. Nanaog siya sa payag. Gipangita niya si Ronald. Nakaplagan niya ang iyang manghod sa payag ni Ka Henry. Nakigsulti siya sa iyang manghod.
“May development na ba bahin sa kamatayon sa atong mga ginikanan?” ni Ronald.
“Wa pa gyud,” tubag ni Ricky. “Inutil ang kapolisan pagsulbad sa krimen.”
“Kami nay bahala sa mga kriminal, Manoy?”
“Unsay buot mong ipasabot?”
“May gitugyanan na si Kumander Abay sa paghimo’g imbestigasyon kalabot sa kamatayon sa atong mga ginikanan,” mipasabot si Ronald kang Ricky. “Ang justice committee sa kalihokan may lead na sa maong kaso. Ang paghipno na lang sa lig-ong mga ebidensiya maoy kuwang. Sa higayon nga masipong na ang tanan, hukman na namo ang mga responsable sa kamatayon nila ni Tatay ug Nanay. -- Sumpayan pa