Walay kamatayon ang gugma
Gula 77
Nagsugod dayon si Jody sa iyang trabaho niang pagka-ugma. Kibale secretary siya ni Mr. Salvador. Gihatagan siya ni Mr. Salvador og eksaktong orientation bahin sa iyang mga buluhaton sa opisina.
Gipakita ni Jody ang iyang kakugi sa trabaho. Dili siya mobuot nga makasaway si Mr. Salvador kaniya. Giisip niyang dakong utang kabubut-on ang paghatag niini’g trabaho kaniya sa panahon nga hapit na siya mokapyot sa suwab sa labaha.
“Pauli na,” giingnan siya ni Mr. Salvador dihang nag-ulhos na’g pamauli ang ubang empleyado sa kompaniya niini. “Traffic ra ba ron.”
“Okey lang, Sir,” ni Jody pa. “Tiwason lang nako kining akong nasugdan. Kadiyot na lang kaayo ni.”
“Kugihan ka gyud diay,” komento ni Mr. Salvador. “Wa gyud ko masayop sa akong pagdawat nimo. Deserving ka sa suweldo nga akong gi-offer nimo.”
“Salamat, Sir.”
Gitingob ni Jody ang iyang panahon sa trabaho. Wala na siya makabalita mahitungod sa iyang amahan, kang Megan ug ingon man kang Randy. Wala na siya’y interes nga makakuha’g kasayoran mahitungod kanila. -- Sumpayan pa
- Latest
- Trending
