Holographic will

Nag-atubang og kasong falsification of public document si Mary Grace Bacus. Kay nipirma siya’g dokumento nga ginganlan og Extrajudicial Settlement diin niangkon siya nga siya rang usa ang manununod sa iyang maguwang nga si Norelyn. Ang nikiha ni Mary Grace, si Byron iyang manghod ug kamanghuran sa tulo ka managsoon.

Nagdaginot man god si Mary Grace sa gastohan. Wa niya paaprobahi sa husgado ang holographic will (testamento nga sinulat sa kamot ug dili notaryado) ni Norelyn. Si Norelyn retirado nga magtutudlo. Dagang guwang. Namatay sa cancer sa matris. Sa buhi pa siya, pinangga kaayo niya si Mary Grace. Gihimo niyang bugtong manununod pinaagi sa holographic will. Apan ang testamento way epektibo kun dili maaprobahan sa husgado pinaagi anang gitawag og probate proceeding.

Nangunsulta si Mary Grace og abogado. Dako og gasto ang probate proceeding. Wa siya nipadayon. Nagpahimo na lang siya’g Extrajudicial Settlement sa laing abogado. Gibalhin niya sa iyang ngalan ang mga titulo sa mga yuta ni Norelyn. Nakadaginot siyas gastohan. Pagkasayod ni Byron sa gibuhat sa iyang maguwang, gikiha niya si Mary Grace. Kay bakak kono ang dokumento nga gipirmahan ni Mary Grace nga siya ray manununod ni Norelyn. Kay duha man silang mga manghod ni Norelyn.

Dihang gipakita ni Mary Grace ngadtong Atty. Ritche Tibon ang subpoena nga patubagon siya sa kiha ni Byron, gisaysayan siya sa abogado kun unsay angay buhaton.

Naa pa sa prosecutor's office (fiscaliya) ang kaso nga falsification. Sa panabang ni Atty. Tibon, gipasaka ni Mary Grace sa husgado ang petition for probate of will. Dayon nipasaka siya og Motion To Suspend Proceeding sa fiscaliya. Gipasuspenso niya ang kaso nga falsification kay ipatuke una kun balido ba ang holographic will kun molutaw nga balido, way falsification nga mahitabo. Kun dili balido, ipadayon ang kasong falsification. Mao nay gitawag og prejudicial question. Unahon ni pagtuki nga isyu aron masuta kun mapadayon ba o dili ang kaso nga falsification batok kang Mary Grace. Ug diha basihi kun sad-an o wa bay sala si Mary Grace.

Nasuspenso sa fiscaliya ang husay sa kaso nga falsification. Nibabag si Byron sa petition pag-aprobar sa testamento. Nipasaka siyag Opposition pinaagi sa iyang abogado nga si Atty. Roy Zapanta. Pildi siya. Kay sa paghusay sa husgado, nakapresentar si Mary Grace og expert witness nga nihatag og report o opinion nga ang agi sa kamot sa sinulat nga testamento, agi gyud ni Norelyn.

Nihukom ang husgado nga balido ang holographic will. Salbar si Mary Grace sa kaso nga falsification. Apan wa siya nasalbar sa gastohan. Kay natriple iyang gasto. Nakagasto siya sa pagparehistro ug pagpublikar sa Extrajudicial Settlement. Nakagasto siya sa pagpahimo og Counter Affidavit. Nakagasto sab siya sa probate proceeding. Naleksiyon siya. Dili diay tanang higayon makaayo ang pagdaginot. Niining hitaboa, imbis magdaginot siya, napilopilo kadaghan ang gasto.

Wa man god siya’y maayong relasyon ni Byron. Pinalabi si Byron sa ilang mga ginikanan sa buhi pa sila. Spoiled o black sheep si Bryon. Dili ikasabutsabut ni Mary Grace. Maong nimaneho lang sab si Mary Grace og iyaha.

Si Byron man gani ang nakaot-ot sa ilang mga ginikanan. Kay gipapirma niyag Special Power of Attorney para pagbaligya sa ilang kabtangan. Gihatagan lang ni Byron og gamay'ng tipik sa halin ilang ginikanan. Unya ang labing dako sa halin giwaldas ni Byron sa barkada, sugal ug babaye. Karon, gipatilaw lang ni Mary Grace, si Bryon sa templa sa kang Byron nga modus o medisina. Bahalag nakagasto si Mary Grace og dako. Kontento siya. Kay nakabawos siya ni Byron. (Alang sa libre nga konsulta, guntinga ning sugilanon ug dad-a sa opisina sa tagsulat. Iatol og Sabado)