Gula 57
“Wa tay gidapigan dinhi sa atong tulumanon,” matud ni Ricky sa iyang komentaryo. “Ang gusto natong ipatigbabaw mao ang hustisya ug katarongan. Hain man ang hustisya sa gibuhat sa mga sakop sa militar nga nagpataka lang og pamusil nga maoy nakaingon sa kamatayon sa duha ka sibilyan nga nasaypan nilang mga rebelde?
Sa misunod nga gabii sa tulomanon ni Ricky sa radyo, subli niyang gihisgotan ang maong isyu. Paggawas niya sa estasyon sa radyo human sa programa, dihay armadong mga tawo nga misugat kaniya.
Wala makalihok si Ricky dihang nasirkulohan dayon siya sa unom ka armadong lalaki nga pulos nagsul-ob og camouflage.
“Ayaw kahadlok, Ricky Liwanag,” nagkanayon ang usa sa unom ka lalaki nga misirkulo kaniya. “Dili mi mga tawong daotan. Dili sab mi nimo mga kaaway.”
“Kinsa kamo?” Nangutana si Ricky. “Ug unsay inyong tuyo?”
“Gustong makigsulti nimo ang among labaw,” maoy tubag.
“Unsa?” Nahakanga si Ricky.
“Kuyog namo karon dayon, Ricky Liwanag,” matud sa lalaking iyang gikasulti.
“Asa ko ninyo dad-a?”
“Masayran mo ra unya kun atua na kita sa maong dapit. Relaks lang. Way daotang mahitabo kanimo. Imo kaming mga higala.” -- Sumpayan pa