Gula 7
Bisan og giunsa pagtimbang-timbang ni Judge Bart, husto g’yud ang mga argumento nga gipresentar sa mga abogado sa kontra ni Mr. Sing diha sa ilang Motion for Reconsideration.
Nabalaka si Bart nga pananglit moinsister siya nga ibaliwala ang argumento sa mga abogado sa kontra ni Mr. Sing, basin og mosumbalik kaniya ang kaso.
Natibuok g’yud ang huna-huna ni Bart, usbon niya ang iyang hukom nga naghatag og pabor kang Mr. Sing. Nagpasabot kini nga si Mr. Sing dili na maoy tinuod nga tag-iya sa yuta nga gitarukan sa iyang hotel sa Guadalupe.
Naghikay si Judge Bart sa iyang order nga nag-usab sa iyang hukom sa kaso nga naglambigit ni Mr. Sing. Takulahaw lang mitingog ang message alert sa iyang cellphone.
Gikan ni Gina ang text message. Wala na basaha ni Bart ang mensahe ug gidiritso niya pag-off ang iyang cellphone. Dili gusto si Bart nga matugaw ang iyang huna-huna samtang nag-andam siya sa order.
Nasayud siya unsay nagpaabot kaniya sa unahan. Sigurado si Bart nga masuko gayud kaniya si Mr. Sing apan wala siya’y mahimo kay trabaho niya isip judge maoy nakataya kun masayop siya sa iyang hukom.
Tuod man, gipagawas gayud ni Bart ang hukom nga nakapasuko ni Mr. Sing. Gitawgan g’yud siya sa Insik nga magpapatigayon.
“Bart naunsa ka gud? Nalimot ka ba nga ako ang nakapahimo nimo nga huwes? Mahimo ka kaha nga huwes kun wala ko pa ikaw irekomendar kaniadto ni Presidente Estrada?” nanumboy na si Mr. Sing.
“Pasayloa ko Mr. Sing. Wala na ko’y mahimo kay lupig kita sa ebidensya,” pintok nga tubag ni Bart ug gi-off dayon niya ang iyang cellphone.
Usa ka hapon, mihapit si Bart sa suki niya nga coffee shop sa dayon na niyang pauli. Gikahimamat niya ang usa ka suod ni Mr. Sing. “Judge, pwerteng sukoa ni Mr. Sing nimo. Hatagan tika og advance info, pasakaan ka ni Mr. Sing og kaso didto sa Supreme Court.”
“Ha? Unsang kasoha ang ipasaka niya nako?” abtik nga nangutana si Bart, apan wala na siya tug-ani sa usa ka suod nga higala ni Mr. Sing.
“Ako pa nimo Judge, duolon nimo si Mr. Sing aron masulbad ang umaabot nimo nga problema. Basta lig-on og ebidensya si Mr. Sing batok nimo nga makapataktak nimo sa pagka huwes.”
Tugaw g’yud kaayo ang kaisipan ni Bart. Tibuok gabii nga wala siya makatulog. (Sumpayan pa)