Anino sa adlaw

Sunod nilang giatake mao ang usa ka presinto sa kapolisan. Giatol nila ang pag-atake sa udtong tutok. Wala makasukol ang mga polis nga nakalitan sa ilang pag-abot. Gipanggapos nila ang mga polis ug pagkahuman gisakiyo nila ang tanang mga armas ug mga bala nga ilang nakit-an sulod sa presinto.

Pagawasa ko ninyo, Sir,” miingon ang usa ka binilanggo sa presinto sa kapolisan nga ilang gisulong.

“Unsay imong kaso?” Gipangutana ni Ronald ang binilanggo.

“Panglugos. Nang-rape ko og 90 anyos tungod kay naulipon ko sa gahom sa ginadiling drugas.”

“Dili ka angay buhian. Angay kang madugta sa bilanggoan,” ni Ronald pa dayong gawas sa presinto ug miagpas nila ni Kumander Abay nga nakabiya na sa maong dapit.

Apan ang kalamposan sa pundok ni Kumander Abay nabaslan og demalas sa dihang ilang gibanhigan ang mga sakop sa militar nga nagpatrolya atol sa Independence Day. Napatyan og mga sakop si Kumander Abay. Kun wala dayon sila mosibog, hayan mahurot silang tanan og kamatay sa mga kamot sa mga sundalo.

Paglabay sa duha ka semana, ang militar na usab maoy mihimo’g opensiba. Human matino ang intelligence report nga may mga sakop sa walhong pundok nga nasigpatan sa usa ka barangay nga nahimutang sa bukiran nga bahin sa lungsod, giplano gilayon nila ang paghimog operation sa maong dapit. -- Sumpayan pa