Walay kamatayon ang gugma

Gula 70

“Nan, nganong nagpabaya ka man? Kun duna kay personal nga problema, ayaw iapil ang imong trabaho. Propesyonal ka man kaha.”

Wala makatingog si Jody. Miduko siya. Mibati siya’g kaulaw sa gisulti sa personnel manager kaniya.

“Gikasubo ko, Miss Garcia,” nagkanayon ang personnel manager . “Pero nasayod ka na sa patakaran dinhi. Pirmahi kanang termination paper. Hatagan ko ikaw og tagal sa pag-submit niana hangtod ugma sa alas kuwatro sa hapon.”

Natangtang gayod si Jody sa iyang trabaho isip opinion editor sa Silver Star Daily. Misamot kamiserable ang iyang kinabuhi. Mipahawa na siya sa hotel nga iyang giestaran kay wala na siya’y ikabayad. Nangabang na lang siya’g kuwarto sa usa ka balay sa Guadalupe.

Ingon sa nagsunod-sunod ang demalas nga miabot sa iyang kinabuhi. Wala na siya’y trabaho. Ang iyang kabalak-an kay gamay na lang iyang kuwarta nga nahibilin sa banko. Sa kanunay niyang paggasto matag adlaw, dili lang damhon nga mahurot ang iyang tinigom. Mao nga kinahanglang makakita dayon siya’g laing trabaho.

Misulay siya’g apply sa Freedom Publications, laing dakong publikasyon sa dakbayan sa Sugbo. Gidawat unta siya. Apan miuntol gihapon ang iyang aplikasyon. Dihang gipangayoan siya’g employment record gikan sa kompaniya nga una niyang gitrabahoan. Wala moisyu og employment record ang Silver Star Daily alang kaniya. -- Sumpayan pa