Palakero nga huwes

Gula 1

Gibati og kagutom si Gina sa tanto niya nga pagsuroy-suroy sa SM City Mall mao nga miadto siya sa food court.

Pwerteng daghana sa mga tawo nga naglinya pagpalit og ilang makaon. Dihang nakakuha na siya og pagkaon, naproblema si Gina kun asa siya molingkod kay puno ang mga lamesa.

Nag-discount sale man gud ang tindahan mao nga pwerteng daghana nga mga customers nga tingali pareho niya gigutom.

Sa tanto nga paglingi-lingi ni Gina, nasabak sa iyang panan-aw ang usa ka hamtong lalaki nga misinyas kaniya nga muoban kaniya paglingkod sa usa ka lamesa.

Napugos si Gina paglingkod kay nauwaw na siya nga nagsige lang og tindog nga nagbitbit sa iyang pagkaon.

"Ayaw kataha Miss. Ako diay si Bart," matud sa hamtong lalaki nga nangutana sa ngalan ni Gina.

"Can I offer you something cold?" tanyag ni Bart human siya tug-ani ni Gina sa iyang ngalan. Gitawag dayon ni Bart ang waiter ug mi-order siya'g duha ka halohalo.

 Samtang padayon sila nga nangaon, walay hunong ang ilang panagsultihanay. "Asa ka diay nagtrabaho Bart?" pangutana ni Gina sa bag-o niyang higala.

"Kuan, naa ko magtrabaho sa Palace of Justice, usa ako ka huwes," kalma ang tingog ni Bart. Daw natuk-an si Gina sa iyang gihungit pagkasayod nga huwes diay ang iyang gikauban.

Giingnan ni Bart si Gina nga dili magbaton og kaikog kaniya kay maayo siya nga tawo. Kini maoy nakaagni ni Gina nga tug-anan si Judge Bart sa problema nila sa ilang pamilya.

Dako og kayutaan sila si Gina apan naproblema silang managsuon kay pagkamatay sa iyang mga ginikanan, gitikasan sila sa ilang uyoan nga igsoon sa iyang papa sa pagbahinay sa yuta nga kabilin sa ilang apohan. "Ah ok, tabangan ko kamo nga mapasaka ang kaso sa hukmanan ug paninguhaon nako nga anha kini mahipunta sa akong sala aron masulbad ang imong problema," matud ni Bart.

Nalipay kaayo si Gina pagkadungog nga tabangan siya ni Bart sa problema sa ilang managsuon. "Salamat kaayo Judge Bart kun imo kami nga matabangan, magbawos ra unya ko nimo."

Tuod man, nasang-at g'yud ang kaso batok sa uyoan ni Gina nga nangilog og yuta nga iya na unta sa iyang mga pag-umangkon.

Didto pa gayud kini mahipunta sa sala ni Bart. Misamot ang kasuod nila ni Gina ug Bart hangtod nga gipangulitawhan sa huwes si Gina.

"Ugma na ang pagpakanaug ko sa hukom sa inyong kaso Gin, ug sigurado nga kamo ang akong padag-on. Mahimo ba og ubanan mo ako karong gabii, manuroy ta," matud sa huwes kang Gina. (Sumpayan pa)