Walay kamatayon ang gugma

Ug wala gayod siya masayop. Sa panabang sa kuwap nga kahayag sa lampshade nga gipahimutang sa ulohan sa kama, nakita niya ang bayhon sa lalaki ug babaye. Nailawom ang babaye sa lalaki. Pulos hubo ang ilang mga lawas nga daw nagbugno sa ibabaw sa kama.

Mora’g nalipong si Jody sa iyang nasaksihan. Daw naulaw siya sa iyang kaugalingon. Ug samtang wala pa makamatikod kaniya sila si Randy ug Megan nga nagtagay sa lawasnong kalipay sulod sa lawak, midali siya pagbiya gikan sa pultahan. Sa iyang pamatyag, mora’g naglutaw siya sa hangin.

Naghilak siya nga midali pagbiya sa balay ni Randy. Gisakitan siya sa iyang nakita. Wala siya magdahom nga makahimo si Randy sa pagluib sa relasyon nila. Misalig siya sa kaligdong sa ulitawo. Apan diay...

Ang sakit kaayong hunahunaon alang kaniya kay igsuon niya ang gitukob niini. Gilumpong silang managsuon. Misantop usab sa iyang hunahuna nga tingali nangita usab si Megan og paagi aron matental niini si Randy gumikan sa pagpasagnunot niini sa biga sa iyang manghod. -- Sumpayan pa