Maanyag nga hulagway

Gula 5

Gilingi nila ni Fred ug Grace ang ilang duha ka kauban nga si Efren ug ang iyang partner nga diha usab sa private room.

Nakita ni Fred nga ang iyang higala nagmaniobra usab diay og iya. Gisabak ni Efren ang iyang partner, apan mora’g wala na makaagwanta iya na g’yud kining gipahigda aron sayon na alang kanila.

Mibiya sila si Fred ug Efren gikan sa Sanciangko’s Wildflower nga tugob sa kalipay. Nagkataw-anay silang duha ug nagsabot pa nga mamalik inigka-sunod adlaw’ng Sabado.

Pagkaugma, nakamata si Fred bisan og kapoy kaayo tungod kay katul kaayo ang iyang armas. Dili niya malikayan nga makawot g’yud tungod sa grabeng kakatul.

Mga alas nueve sa buntag, nabantayan ni Fred nga nagpuwa na ang iyang armas ug daw naghubag tungod tingali sa pagsigi’g kawot.

Gitiksan niya ang iyang higala. Taud-taud, nakadawat siya’g reply gikan kang Efren. “Mao ba Bay? Ako usab nakasinati og grabeng kakatol.”

Tibuok adlaw’ng Domingo, wala mahimutang si Fred tungod sa grabeng kakatul sa iyang armas. Ang kakatol mihinay na og kuyamang sa palibot sa iyang pikoy.

Nahukman ni Fred nga hilom siya nga muadto sa City Health department aron magpahiling sa Sexually Transmitted Diseases (STD) section.

Nakadungog si Fred sa balita sa pamantalaan nga ang City Health STD section nagtanyag og libre nga check-up niadtong nagduda nga natakboyan og sexually-transmitted disease.

Human siya ma-examine sa doktor, gipatawag si Fred ni Dr. Ilya Tac-an, ang hepe sa STD Section. Gipangutana si Fred kun diin niya makuha ang sakit.

“Unsa diay ning akong sakit Doc?” mabalak-on nga nangutana si Fred. “Natakboyan ka og syphilis.” Gihatagan si Fred og resita sa doktor aron paliton og imnon aron mahanaw ang katul-katol.

“Sige Doc, salamat kaayo,” migawas na unta si Fred sa STD section dihang nasugatan niya si Efren. “Bay Fred, dia ka sab diay? Magpa-check-up usab ko Bay kay gikuyawan ko,” gihunghongan ni Efren ang iyang higala.

Giubanan ni Fred ang higala ngadto ni Dr. Tac-an. “Doc, kaming duha ang nagkuyog kaniadtong Sabado sa gabii ug nakig-partner sa batan-ong dancers.”

 Samtang gi-examine si Efren sa doktor, giliraw ni Fred ang iyang mga mata sa chart diha sa bungbong.

Misiga ang mga mata ni Fred pagkakita sa statistics nga miabut na og 150 ka tawo ang namatud-ang positibo sa HIV gikan lang kaniadtong Enero hangtud sa Hunyo.Nag-ampo siya nga dili unta kini mahitabo kanilang managhigala. (Sumpayan pa)