Walay kamatayon ang gugma

Gula 64

 Kalit lang gikulbaan si Jody. Wala siya makasabot sa iyang gibati. Nagkadaiyang mga pangagpas misapigad sa iyang hunahuna.

Mipaingon siya sa dakong pultahan sa balay. Iyang nasuta nga abiyerto gihapon kini. Misamot ang kakulba nga iyang gibati.

Misulod siya sa pultahan. Sa paghimuntog niya sa sala, iyang nasuta nga walay tawo nga nagtikawtikaw sa palibot. Nagmingaw ang sala. Gipasuroy niya ang iyang mga mata sa palibot apan wala gayod siya’y nakitang tawo.

Mihinay si Jody paglakang paingon sa nahimutangan sa lawak ni Randy. Niining tungora, diha nay daotan nga misantop sa iyang hunahuna. Kini nakapasamot sa gibati niyang kabalisa.

Napahunong si Jody sa paghitungod niya sa pultahan sa lawak ni Randy. Abiyerto kini. Mikang-a gani og diyotay ang palid sa pultahan. Ug misanting ang iyang mga dalunggan sa iyang nadungog gikan sa sulod sa lawak. Hangos ug agulo sa lalaki ug babaye nga nagtagay sa kalipay ang iyang nabati.

Natawo ang dautang katahap sa hunahuna ni Jody sa iyang nadungog. Apan dili siya gustong magbanabana lang. Mihinay siya’g lili sa kang-a sa palid sa pultahan aron pagsuta kun tinuod ba ang iyang katahap. -- Sumpayan pa