Plaza Roman

Nanulod mig Plaza Roman, labing sikat nga masahian sa Davao niadtong unang pagkadestino namo sa maong siyudad. Mamords kaayo ang mga masahista. Ilang dagway mora’g artista. Paglabay sa usa ka oras, nanguli mi sa among boarding house. Gikasuk-an ni Mario si Igi. "Lawgawa nimo, Gi, uy. Nagsul-ob man lang kag debraso didto. Unya gision pa!"

"Ah, gituyo ni nako, Titi Mar." Ni Igi pa nga nagtingsi. "Diskarte ni nako para makabarato ko sa bayad. Gituyo ni nako aron ang babaye nga ma-partner nako, akong patuhuon nga mananagat lang ko."

"Unya kadtong babaye nga mimasahe nimo, mituo?" Paloap nga sukna ni Mario.

"Mo lang. Puwerteng ilara. Gani, imbes full ang akong bayran. Nangayo ra siya’g katunga." Seryosong tug-an ni Igi. "Nadala sa akong pag-inartista."

"Mao ba? Kasuwerte god nimo?" Ni Mario pa nga mipabuhot sa iyang sigarilyo.

Naintriga ko sa gisulti ni Igi. Misalga: "Kay pila ra man diay ang imong nahatag, Gi?"

"Sa sinugdanan, iya kong gibungatan og P1.000. Ako siyang giingnan, mahal ra. I can not afford. Akong giesplikaran nga mangingisda ra tawon ko. Ug P500 day sulod sa akong relos. Haskang dalia nakahukas sa iyang sotana, uy!" Niya pa, ay: 'Sige, payts na kana!" Mao to, P500 ray akong nabayran."

"Haaa???" Dungan mig kahingangha tanan. "Dakoa god?"

"Kay pila ra man diay inyong nabayad?" Pakisusi ni Igi.

"Ang akong nabayran?" Salga ni Mario. "P300 ra. Unya all the way down na!"

Naamang si Igi. Iyang dakong ilong nga tawgon namog Rudolph The Red Nose Reindeer misamot kapula. Didto pa siya masayod nga gisakaysakayan lang diay sa masahista sa Plaza Roman. Ug wala diay kini mailad sa iyang diskarte. Kun dili, siya pa ang nailad. Nalimot si Igi nga ang mga namuyo sa maong lugar, dili hinay'g utok. Kun dili, pulos abtik!