Walay kamatayon ang gugma

Nasuta ni Jody nga dili gayod makadawat si. Mr. Garcia kang Randy isip iyang hinigugma. Nasuheto siya sa iyang amahan. Dili kini maantigong mousab sa hunahuna. Maliso pay buko sa kawayan, matud pa. Maong kinahanglan gyud siyang mamili tali kang Randy ug sa iyang amahan. Pagkalisod nga desisyon!

Taudtaod nga naghinuktok si Jody. Unya dihay hukom nga inanay nga mikanaog sa iyang hunahuna.

“Gikasubo ko, Dad,” mikurog ang tingog ni Jody samtang namulong ug ang iyang mga mata gipanglugmawan sa mga luha. “Pareho kamong mahinungdanon alang kanako. Apan si Randy ang akong pilion.”

“U-unsa?” Mitungas ang tingog ni Mr. Garcia nga daw dili makatuo.” Animal!”

“Pasayloa ko, Dad,” ni Jody. “Apan kini lay timan-i. Bisan mao kini ang nakab-ot kong desisyon apan gitahod ko gihapon ikaw isip akong amahan.

“Wa kay batasan nga pagka-anak,” ni Mr. Garcia. “Gipalabi mo ang laing tawo kay kanako. Pwes, magkalimtanay na lang ta. Kanaog karon dayon niining akong panima’y. Gikan karon, wa na koy anak nga sama kanimo.”

Nahimangod pag-ayo si Jody sa paghingilin ni Mr. Luis Garcia kaniya. Apan nakahukom na siya. Gipalabi niya si Randy kay sa iyang amahan. Mao nga gidawat niya ang hagit sa iyang daddy. Mobiya siya sa ilang pinuy-anan. -- Sumpayan pa