Anino sa adlaw

“Kun duna ka nay matumbok nga responsable niining hitaboa, pahibaw-a dayon ko kay pangunayan ko ang pagsilot kanila.” Wala motingog si Ricky.

“Dili mahimong magdugay ko, Manoy,” ni Ronald pa. “Tingalig may mga kaaway nga makatiktik sa akong presensiya. Adto na ko.” Nanamilit usab si Ronald kang Teresa. Pagkahuman, mibalik na siya sa nahimutangan niini.

Human ikalubong ang mga ginikanan ni Ricky, mibalik na siya sa naandan niyang tulumanon sa estasyon sa radyo DYTM matag gabii. Inanay nang mibalik sa normal ang iyang kinabuhi. Sa pagbalik niya sa programa sa radyo, una niyang gipasalamatan ang tanang mga tawo nga miduyog sa iyang kasub-anan.

Tapos sa pasalamat nga iyang gipalanog sa kahanginan, nagpusotpusot ang mga tawag sa telepono gikan sa mga suki niyang tigpaminaw sa radyo. Nipadayag sila’g kahinangop nga nakabalik na siya sa programa. Mipadangat sab sila sa naulahi na nilang pahasubo ngadto kang Ricky tungod sa kamatayon sa iyang mga ginikanan.

Gisunod dayon pagtuki ni Ricky sa iyang tulumanon ang mas dagkong mga isyu nga may labot ang lungsod. Una niyang gihisgotan ang balita nga nag-atubang na diay og kasong administratiba ang mayor sa ilang lungsod sa pasangil nga lapad nga pangurakot nga gikalambigitan niini. Tungod sa kaabunda sa mga ebidensiya nga mosuporta sa pasangil, giingong mora’g madutlan gayod ang mayor sa kaso. -- Sumpayan pa