Gula 40
Mikalma si Ronald. Nagpabilin siyang naghupo sa iyang gitagoan. Igo lang siyang milantaw ngadto sa mga lungon sa iyang mga ginikanan. Nakita niya si Manoy Ricky niya nga nagbarog duol sa gipahimutangan sa duha ka lungon.
Dihang gisugdan na pagbalhog ang usa sa mga lungon ngadto sa panteyon, wala na gyud makapugong si Ronald sa iyang kaugalingon. Mikalit siya’g gawas sa iyang gitagoan nga wala mabantayi ni Ka Henry. Mipaduol gayod siya sa mga lungon sa iyang mga ginikanan aron pagsud-ong kanila sa kataposang higayon.
Nakugang ang mga tawo nga mihatod sa lubong sa kalit niyang pagtungha. Lakip si Manoy Ricky niya nakugang usab. Naggaksanay sila si Ricky ug Ronald. Unya miduol si Teresa nga mitambong diay usab sa lubong. Kini na usab ang gigakos ni Ronald. Unya, sa kataposang higayon, gisud-ong niya lagbas sa salamin sa lungon ang mga panagway sa iyang mga ginikanan. Wala niya kapugngi ang paglugmaw sa iyang mga luha.
“Pasayloa ko, Ronald,” nagkanayon si Ricky nga miagbay kaniya. “Wa ko kapanalipdi ang atong mga ginikanan.”
“Wa kay sala, Manoy,” ni Ronald pa. “Ang angay manubag niini mao ang mga tawong responsable sa ilang kamatayon. Kinsay imong gidudahan nga maoy utok ug responsable sa kamatayon nila ni Tatay ug Nanay?”
“Dili pa ko makatumbok kun kinsa gayod. Daghan kaayo ang nasuko nako.” -- Sumpayan pa