Gula 55
Kalit milugapak ang wala niyang aping. Gitamparos siya sa iyang daddy.
“Nakakat-on ka na diay sa pagpamakak kanako karon,” lag-it kaayo ang tingog ni Mr. Garcia.
Wala siya motingog. Ug wala na siya makapugong sa paghilak.
“Nanawag ko sa inyong buhatan,” nagkanayon si Mr. Garcia. “Giingnan ko sa nakatubag nga sayo kang migawas sa opisina.”
Nahilaw si Jody. Milipaghong ang iyang nawong kay nabuking ang iyang pagpamakak. Miduko siya sa atubangan sa iyang amahan kay dili siya makaharong sa tinan-awan niini kaniya. Nagpadayon pagtubod ang iyang mga luha.
“Diin ka man nga dugay ka man nga mipauli?” Gikan ni Mr. Garcia. “Nakigkita ka ba niadtong Randy Maglana?”
“O-oo, Dad,” mubong tubag ni Jody.
Nakahukom siyang tug-anan ang iyang daddy sa matuod. Nahadlok siya nga tingalig mabuking na usab niini kun mamakak siya pag-usab. Mao nga mitug-an na lang siya sa tinuod, bahala na’g unsay buhaton sa iyang amahan kaniya.
“Punyeta!” Milagaak ang tingog ni Mr. Garcia. “Di ba giingnan ko na man ikaw nga ayaw na pagpakigkita niadtong lalakiha kay wala kay makuhang kaayohan gikan kaniya?”
“Nasayop ka, Dad,” ni Jody pa. “Buotan si Randy. Ug may stable na nga trabaho. Nganong dili ka man makadawat niya?” -- Sumpayan pa