Gula 54
Dihang nakabiya na si Randy, milahos na siya sa balay. Wala siya maglisod pag-abli sa dakong pultahan kay may kaugalingon man siyang yawe niini. Mingaw na ang palibot. Wala nay timik ang sulod ug gawas sa balay.
Misulod dayon siya dihang natukas ang palid sa pultahan. Apan nahaigking siya paghimuntog niya sa sala. Mikalit lang pagsiga ang suga sa hawanan. Nakita niya ang iyang amahan nga naglingkod sa sopa. Hait kaayo kini’g tinan-awan kaniya.
Kalit lang gikulbaan si Jody. Dihay managlahing pagbati nga nagsungag sa iyang kahiladman. May kabalaka nga milighot sa iyang hunahuna.
“D-Dad,” gisangpit niya si Mr. Luis Garcia. “W-wa ka pa diay matulog?”
“Nganong karon ka lang mahiuli?” Gahi ang tingog sa iyang amahan nga misumbalik pagpangutana kaniya.
Wala makatingog si Jody. Sa tuno sa tingog sa iyang amahan, nasabot niya nga may kasuko kini kaniya.
“Tingpauli pa ba karong orasa sa usa ka babayeng tarong?” Laing pangutana ang gipasupot sa iyang amahan. Mitindog kini nga nagpangusmo sa tumang kalagot.
“I-I’m sorry, Dad,” ni Jody pa nga nakabunlot og bakak nga katarongan. “Nag-overtime mi sa editorial. Importante kaayo.” -- Sumpayan pa