Haligi sa pamilya nga gi-anay

"Saba diha pa oi, nangapo nalang ka wala gihapon ka na-usab sa imong batasan ug imong mga linihokan sige lang gihapon ka sa imong pagsugal ug imong pag adik-adik," gahot ni Ryan sa iyang papa."

Pamatyon hinuon tamong tanan sige tubag pa Ryan,” sudya ni Imok sa iyang anak.

Nanghasi si Imok gilabay niya ang mga planggana, kaldero, bangko ug gi-ibot ang ilang purtahan ug gipanglabay sa gawas sa ilang balay.

Nanagan silang Ryan ug iyang mama nga si Emie ug iyang mga igsuon nga si Renan, Mae, Kekent, ug Itong, pwerte hadloka nila sa ilang amahan. Nagdagan sila nga naghilak ug nangadto sila sa igsuong Emie nga si Gloria para didto nalang sila mangatulog ug mokaon.

Pito ka magsuon sila. Ikatulo siya, iyang duha ka maguwang poros na naminyo ug si Ryan nalang ang gisaligan sa adlaw adlaw nga konsumo sa iyang pamilya ug pulos pa mga gagmay ang iyang mga manghod si Renan 15, si Kekent 8, si Mae 4 ug si Itong 1 anyos.

Si Ryan usa ka trabahante sa sikat nga food chain diri sa Sugbo. Nagdako si Ryan sa kabos nga kinabuhi ug naningkamot nga mahaw-as niya iyang pamilya sa kalisud kay wala ray pakabana iyang amahan kanila mas giuna pa ang bisyo kay sa pamilya.

Dili man unta sila magkalisud dili lang adik-adik ug sugarol iyang papa. Namat-an na ni Ryan sukad sa iyang pagkabata, nga kun dili gani makasuyop iyang papa sige lang mag-init ang iyang ulo ug bun-ogon iyang mama gani wala siyay mabuhat kay tungod mahadlok siya sa iyang amahan.

Tulo ka adlaw wala mopauli ang iyang pamilya sa ilang balay sukad sa iyang pagpanghasi tungod kay mahadlok sila sa ilang amahan. Dili katulog si Emie sa kakulba kay basin mokalit lang og apas ang iyang bana ug unya'g hilabtan sila hilabi na nga gagmay pa ang iyang mga anak.

Mga alas diyes sa gabii nikalit lang og abot si Imok ug isog kaayo. Gipangita iyang pamilya, silang Gloria lang ang miatubang ni Imok ug silang Ryan nanago sa kuwarto ug gipang-kulbaan og maayo. Wala na ka aguwanta si Ryan nigawas kini.

"Pa ayaw namig hilabti." Gahilak samtang nagsulti. Gikalit og duol si Ryan sa iyang papa ug gikulata. Wala mosukol si Ryan gipasagdan ra ni Ryan ang iyang amahan nga mikulata kaniya ug wala sab kauwang silang Gloria tungod kay kusgan kaayo si Imok.

Milabay ang pila ka gutlo wala na maglihok si Ryan, migawas si Emie nga nagdagan paingon sa iyang anak nga naghilak.

"Unsa man Mok nalipay naka nga nakadapat ka sa imong anak?" pulong ni Emie nga nagbakho. Wala motingog si Imok. Dili siya katuo sa iyang nabuhat." “Ikaw ray haligi sa balay nga gianay,” hagawhaw ni Emie. Nilakaw si Imok ug naghilak. Demonyo gyud diay ning ginadiling droga," sulti niya sa iyang kaugalingon. (Kataposan)