Makadungog gani ko ron sa kanta ni Max Surban nga giulohan og "Sa Una Kong Pagtan-aw og Sine" mahimuot gyod ko kay mora sab og adunay pagkatinuod.
Tuig 1961 kadto ug segundo grado ko niadto. Gikuyog ko sa akong amahan usa ka hapon niana sa pagtan-aw og sine diha sa Gems theater sa may D. Jakosalem st. ning dakbayan.
Kinawboy to ang salida. Pagsulod namo sa sinehan puwerting ngitngita mao tong mikupot ko og maayo sa iyang kamot kay makadasmag ug masarasay unya ta.
Daghan man tong mga tawo mao tong gipalingkod ko ni Papa sa iyang paa. Gamay paman sab ko niadtong higayona. Otso anyos pa ang akong edad. Grabe nakong lisanga kay pinusilay ang salida samtang nagsakay sa kabayo ang mga 'cowboy' ug ang mga Indian usab nagpaulan sa ilang mga pana isip ilang bawos.
Grabe gyong kombatiha. Puwerti nakong lugnot-lugnot ug hupo-hupo kay maigo unya ko. Mao tong gibadlong ko sa akong amahan.
"Ayaw'g saba kay naay daghang mga tawo. Salida ra ni dili ka maigo," sulti pa niya nga nagdala og kasuko.
Unsa man tong hitaboa nga nakakita na man sab ko og tren nga hilabihang pagkataas ang dagway ug naghaguros ang dagan niini ug nag-atubang ra ba gyod namo.
Puwerting hadloka nako kay maligsan lagi unya mi. Nag-ulpot ulpot ko samtang naglingkod ko sa paa sa akong amahan. Nangisog na gyod ko nga makabarog apan sa wala lang nako damha nakasinggit kog aray dihang gilaknit niya ang akong paa ug gisundan pa gyod niya og hapak sa iyang kamot ang akong lubot nga nagsul-ob sa bag-ong purol nga tatak alpine nga pinalit ni Mama sa merkado sa T. Padilla kaniadto.
Nanghapdos god ang akong paa nga agi sa iyang kinusian. Pagkatapos sa salida, nangaon mig siopao pinarisan sa softdrink nga Asya.
Sa pag-uli namo, mipahaba ko sa akong inahan apan igo lang kong gikataw-an niya.(Kataposan)