Gula 35
“Condolence” matud ni Teresa nga nahiabot usab pipila ka gutlo human nakabiya ang mayor, bise mayor ug mga konsehal sa ilang lungsod.
“Maayo kay nia ka,” nagkanayon si Ricky.
“Nasayod na ba si Ronald niini?”
“Wa pa. Wa koy ideya kun unsaon ko siya pagpahibalo. Dili siya makontak sa iyang cellphone nga dugay na kining wa niya gamita.”
Ang balita sa kamatayon sa mga ginikanan sa managsuon nga Ricky ug Ronald Liwanag dali rang nakaabot ngadto sa bukid nga gikampohan sa mga rebelde. Usa sa mga sakop sa legal front sa ilang grupo ang nagpahibalo kanila mahitungod sa nahitabo sa mga ginikanan ni Ronald. Naguol ug nahasol siya pag-ayo sa maong hitabo.
Gusto siyang molugsong sa patag aron pagtambong sa haya sa iyang mga ginikanan apan dili mosugot si kumander Abay. Gipasabot siya sa kumander nga delikado kaayo kun iya kining buhaton kay posibleng pahimuslan sa militar ang higayon ug masikop na hinuon siya. Mas modako na hinuon ang problema.
“Patuo nako, Ka Ronald,” ni Kumander Abay. “Dili maayong magpinutong ka.”
“Pero gusto kong makakita sa akong mga ginikanan bisan sa kataposan na lang nga higayon, Kumander,” nagkanayon si Ronald nga naghikiros ang balatian. -- Sumpayan pa