Anino sa adlaw

Gula 34

Gitagsatagsa ni Ricky pagsapupo ang iyang mga ginikanan. Giuna niya ang iyang amahan ug dayon ang iyang inahan. Naluoy siya sa ilang gidangatan. Gipatay sila sa mga tawong salbahis. Karon pa lang gani, may gidudahan na si Ricky. Natahap siya nga ang kamatayon sa iyang mga ginikanan may kalabotan sa iyang trabaho isip sakop sa media. Ang iyang mga ginikanan maoy gipahimungtan sa mga tawo nga nasuko kaniya.

Niana dayong gabhiona gi-report ni Ricky ang nahitabo sa iyang mga ginikanan ngadto sa kapolisan. Miresponde gilayon ang mga polis sa ilang lungsod. Pero taphaw ang iyang pagsalig nga makahimo ang kapolisan pagsulbad sa kasong pagpatay sa iyang mga ginikanan. Nagtuo si Ricky nga dili mataral ngadto sa hukmanan ang mga responsable sa krimen kun maoy laoman ang effort sa kapolisan.

Hinuon, iyang gihatag ngadto sa polisya ang benefit of the doubt. In fairness, siya nagtuo nga aduna pay mga polis nga nagtinarong pagtuman sa ilang katungdanan ug pipila lang ang nagpabadlong. Busa, gihatagan gihapon niya’g kahigayonan ang kapolisan sa ilang lungsod nga makahatag og pruyba sa seryosong pagpangalagad.

Samtang gihaya ang mga ginikanan ni Ricky, mi-leave siya sa iyang tulumanon sa radyo matag gabii. Lain una ang iyang gipalingkod sa maong programa. Usa ka gabii niana, mi-vigil ang mayor, bise mayor ug tanang mga konsehal sa lungsod sa haya sa iyang mga ginikanan. Mipadangat sila sa ilang mga pahasubo ngadto kaniya. Apan namatikdan ni Ricky ang kataphaw sa pagbati sa mayor kaniya sa ilang paglamanohay. -- Sumpayan pa