Walay kamatayon ang gugma

Gula 52

“No,” mibalibad si Jody. “Ayaw na lang. Dili ko gustong makit-an ka sa akong amahan.”

“Ayaw kabalaka,” matud ni Randy. “Kutob ra ko sa gawas. Dili mahimong pasagdan ko ikaw nga mopauli nga mag-inusara. Lawom nang gabii.”

Gitan-aw ni Jody ang relo sa iyang bukton. Hapit na diay ang ikanapulog usa nga takna sa kagabbion. Wala lang niya maalinggati ang pagpangligid sa mga takna. Sa makadiyot ang iyang kalibotan didto motuyok kang Randy.

“Sakay na,” agda ni Randy.

Misanong siya. Miluwan siya sa awto ug mipahimutang sa front seat tupad sa driver’s seat nga maoy pagalingkoran ni Randy. Gitak-op sa ulitawo ang pultahan sa tuong kilid sa sakyanan sa dihang nakapahimutang na siya.

Kadali rang nakalipot si Randy sa walang kilid sa sakyanan ug mipahimutang paglingkod atubangan sa manibela. Gipaandar gilayon niini ang makina.

“Sa nahitabo kanato karon,” nagkanayon si Randy samtang nagdagan ang ilang gisakyan. “May lig-on nang katarongan kun nganong ipakig-away nato ang atong gugma. “Karon nga may nahitabo na kanato, mosamot nga dili ko makatugot nga putlon sa imong amahan ang atong pagminahalay.” -- Sumpayan pa