Album sa gugma

Sa wala pa matulog si Almira, gitagsa-tagsa niya pagtan-aw ang mga letrato sa album. Gimahal niya ang album, giampingan niya sa sulod sa iyang lawak. Ug sa iyang kasingkasing.

Mga letrato nila ni Jimbo ang sulod sa album, walay lain. Gikan sa ilang panaghigugmaay ug hangtod na sa ilang pagkasal. Nakaginhawa og lawom si Almira. Duha ang naninguha sa iyang gugma sa nagtungha pa siya sa kolehiyo, si Jimbo ug si Kendrick. Si Jimbo ang iyang gisugot ug gipakaslan dihang nakahuman na sila sa pagtungha ug duna nay trabaho.

Apan wala na si Jimbo.

Gitak-op ni Almira ang album ug gibutang sa drawer sa aparador. Mihigda siya sa kama, gitutokan ang bugtong anak nga lalaki, nag-edad og singko.

“Liwat gyud siya ni Jimbo,” hilom nga nakaingon si Almira. Jimbo Jr. ang ngalan sa bata ug gianggaan niya og RJ. Gigakos niya ang anak ug natulog na siya.

Pagka-ugma sa buntag sa wala pa siya mulakaw sa gitrabahoang opisina, nakigsulti una siya sa iyang hamtong nga katabang nga mao say yaya sa iyang anak.

“Nang, ang pagkaon unya ni RJ ayaw daghana ang kan-on, sud-an ug juice ayaw sab kalimti.”

“Oo, Day.”

Usa ka Accountant si Almira sa gitrabahoang kompaniya sa siyudad. Ug usa sa iyang kauban sa trabaho mao si Kendrick. Nangulitawo kini pagbalik kaniya apan wala siya masayod kun sugton ba niya kini. Gihigugma niya pag-ayo ang iyang bana.

“Patay na si Jimbo. Gikasubo ko nga giatake siya sa kasingkasing. Pero may katungod ka nga magmalipayon. Hangtod kanus-a nga magpabilanggo ka sa imong gugma kaniya?”

Nahinumdom si Almira sa gisulti ni Kendrick dihang namisita kini kaniya. Tinuod nga naglisod siya sa paglingkawas sa iyang gugma kang Jimbo.

“Nagkinahanglan og amahan si RJ sa iyang pagdako. Isipon ko siyang tinuod nga akong anak kun sugton mo ako. Magpakasal ko nimo.”

Nanghupaw si Almira nga naghunahuna sa mga pulong ni Kendrick. Ug sa iyang pag-abot sa trabahoan, nakapanglingo siya, apan may pahiyom ang iyang mga ngabil nga nagtan-aw sa preskong mga bulak nga gibutang sa flower vase nga nagpatong sa iyang office table. Nasayod siya nga gikan kang Kendrick ang mga bulak.

“Good morning!”

Wa dayon siya makamatikod sa pagduol kaniya ni Kendrick.

“Good morning sab.”

“Mamisita ko nimo unyang gabii. Unta, makadesisyon ka na.”

Wala siya motubag. Walay tingog nga mibiya kaniya si Kendrick. Lawom ang iyang gihunahuna. Niining higayona, gitugkad niya pag-ayo ang iyang gibati, apil na ang iyang kagahapon ni Jimbo.

Sa iyang pagpauli nianang pagka-gabii, nagdala siya’g karton. Sa sulod sa iyang lawak, gipanulod niya sa karton ang mga kuwadro ni Jimbo nga nagbitay sa bungbong. Unya gikuha niya ang album sa drawer sa aparador, dugay niya kining gitutokan. Gihagkan niya kini ug gisulod sab sa karton. Ug ang karton iyang gihiposan sa gawas sa iyang lawak.

Unya, mahinamon siyang naghulat sa pag-abot ni Kendrick. Wala nay kahasol nga iyang gibati. Wala na siya hasola sa iyang gugma kang Jimbo. Wala na. – Kataposan