Anino sa adlaw

Gula 32

“Pasensiya ka na kun wa ka makauyon. Dili man sab alang nimo ang maong komentaryo. Alang kadto sa katawhan nga angay masayod sa kamatuoran. Alang sa mga magbubuhis nga gitulis sa mga kurakot ang ilang mga siningtan.”

“Isog ka na kaayo ron, da. Nagsalig ka nga may igsuon ka nang rebelde?”

“U-unsay buot mong ipasabot?”

“Ayaw na lang pagminaut, Ricky Liwanag. Nadawat na namo ang intelligence report nga nagbutyag nga miabin na sa mga rebelde ang imong manghod nga si Ronald Liwanag.

“Gihimo lang niya ang unsay iyang gituohan nga kabahin sa iyang katungod ug kagawasan. Kun unsa man ang gibuhat sa akong manghod karon sa bukid, wa koy kalabotan niini. Managlahi ang matang sa among pagpakigbisog.”

Wala makalahutay si PO2 Savedra sa pagpakiglantugi kaniya. Kanunay kini niyang lupigon sa katarongan. Apan mibiya kini sa iyang nahimutangan nga nagbilin og bahad. Pero wala mahadlok si Ricky sa hulga sa maong polis.

Pagkasunod gabii, mao na usay gihisgotan ni Ricky sa iyang tulumanon sa radyo ang usa ka konsehal sa ilang lungsod nga nalambigit sa illegal nga pagpangubkob og bas sa sapa. Ang maong konsehal bag-o lang nakadaog sa miaging piliay apan nagpakita dayon og pagpangabuso. -- Sumpayan pa