Mogula matag Biyernes Problema sa apelido

Naghinuktok si Allan Larrobis ning sayong buntag samtang naglingkod sa lantay sa ilang pantawan. Naproblema siya sa iyang kamaguwangang anak nga si Efren. Siyete anyos na. Nag-eskuyla na sa grade one. Na-enrol sa Canduman Elementary School.

Apan wa kadala sa iyang apelido. "Reyes" ang gidala, apelido sa iyang inahan nga si Teddylyn. Unsaong wa pa man sila nakasal pagkatawo ni Efren. Way kaso ang duha ka manghod ni Efren nga sila si Rel ug Jover. Kay napatik na man ang ngalan ug apelido ni Allan sa ilang birth certificate. Sa birth certificate ni Efren wala napatik ang ngalan ni Allan. Nagpanglantaw siya sa halayong bungtod ug kabukiran sa Tawason. Nagligutom ang mga panganod kay kaulanon.

"Oh! Nganong naghinuktok ka man? Di ba musayo man ka sa Maritrans Forwarders? Alas siyete na!" ni Teddylyn nga medyo paraygon. "Ready na ang pamahaw!" dugang niya.

Nakugang si Allan. Napakgang ang iyang paghanduraw. Freight clerk siya sa Maritrans. Unya daghan siya’g backlog nga mga papeles trabahuonon. Gusto gyud unta siyang mosayo. Apan gilaay siya.

"Problema lagi’g unsaon nang papeles ni Efren. Wa siya naentra nga dependent sa akong SSS record. Kun mogradwar siya’g elementarya, apelido nimo ang masulat sa iyang diploma," ni Allan nga morag nagluya. Nitindog siya aron mosulod sa sala. Dayon ngadto sa talad kan-anan. Bug-at iyang gipamati sa lawas.

"Di ba naa man moy legal counsel sa opisina?" ni Teddylyn. "Naa.Pero pwerteng bisiha. Maikog kong moduol," ni Allan.

"Tayminga lang panahon sa coffee break. Basig maka-ambush ka’g pangunsulta" ni Teddylyn.

Kauban silag trabaho ni Teddylyn sa daga’g ulitawo pa sila. Accounting clerk si Teddylyn. Nagkasuod sila. Nagkauyab sa M.U. lang. Unya nag-live-in.

Wa una pakasal. Kay may polisiya man ilang kompanya nga way bana’g asawa nga mag-uban sa trabaho. Kinahanglang magpili sila’g kinsay moresayin. Si Teddylyn ang miresayin paghuma’s ilang kasal. Nagtindatinda na lang sa ilang balay sa Tawason. Unya nangluto’g pagkaon. Naghinayhinay sab siya’g review para board exams pagka-CPA. Namalit og mga libro nga reviewer. Nag-home study siya. Samtang gagmay pa ilang mga anak.

"Attorney, puwede ko mangunsulta?" ni Allan dihang nag-abut sila sa canteen usa ka hapon, ni Atty. Noel Penaflor. Gikulbaan si Allan kay basig seko ang abogado.

"Unsa may problema nimo?" sa abogado nga malumong tuno. Gibutang sa lamesa ang tasa human niyag higop og gamay sa kape. Approachable diay ang abogado. Nibirag bakanteng lingkuranan si Allan ngadto’s tupad dapit sa tuo sa abogado. Nilingkod. Ug gisaysay ni Allan iyang problema.

"Sayon ra na!” sa abogado.

"Unsa may angay buhaton nako attorney?" ni Allan.

"Kamong mga ginikanan mopirma og Affidavit of Legitimation. Inyong pamatud-an diha nga kamo ang ginikanan ni Efren. Apan wa pa mo makasal pagkatawo sa bata. Sa dihang nagkarelasyon mo, puros mo way kabilinggan. Way sabit nga minyo ang usa o kaha kamong duha. Unya nakasal mo human sa pagkatawo sa bata. Isumiter ninyo ang affidavit sa Local Civil Registrar uban sa inyong Marriage Contract ug sa Birth Certificate sa bata. Usbon sa Local Civil Registrar ang Birth Certificate ni Efren aron mabutang imong ngalan ug apelido. Dayon isumiter nimo sa eskuylahan ang bag-ong Birth Certificate sa bata. Mausab na ang record sa eskuylahan. Mao sab sa SSS, isumiter ang bag-ong Birth Certificate ug malista na nga dependent si Efren," sa abogado.

"Pila may akong bayranan sa konsulta?" ni Allan. Nagpahiyom.

"Way bayad. Pero'g akoy imong pahimoon sa affidavit, magsabot lang unya ta," sa abogado. Nitindog.

"Mag-una ko," dugang niya.

"Salamat attorney," ni Allan. Daw naibtan og tunok. (Alang sa libre nga konsulta, guntinga ning sugilanon ug dad-a sa opisina sa tagsulat. Iatol og Sabado)