Gula 31
Milabay ang tulo ka adlaw. Si Ricky Liwanag nakakuhag mga dokumento nga mosuporta sa iyang pasangil nga ang mayor sa ilang lungsod mi-overpriced sa proyekto niini nga People’s Park. Gilabhan og maayo ni Ricky ang mayor sa iyang mga komentaryo sa tulumanon niya sa radyo. Hait kaayo ang iyang mga panahom batok sa mayor.
Paggawas niya gikan sa estasyon sa radyo nga iyang gialagaran, may nag-atang kaniya.
Nakugang si Ricky dihang iyang nailhan nga si PO2 Alexander Savedra ang nagbarog duol sa giparkingan sa iyang motorsiklo. Nakasabot dayon siya nga siya’y tuyo niini. Sipsip ug diehard kaayo sa mayor ang maong polis.
“Maayong gabii,” mitimbaya si Ricky dihang nahiduol na siya sa gibarogan niini.
“Ngilngiga nimo, no,” lain ang gitubag ni PO2 Savedra. “Hait ka man kaayo’g mga komentaryo batok sa mayor.”
Namatikdan ni Ricky nga mora’g nakainom si PO2 Savedra. Nguhal ang sinultihan niini ug nanimaho kining ilimnon nga makahubog.
“Namati ka diay sa akong programa?” Sukit ni Ricky.
“Kaayo,” gibundak sa polis ang maong tubag. “Ug wa ko makauyon sa imong mga komentaryo. Imong gidaot ang mayor sa atong lungsod.” -- Sumpayan pa