Anino sa adlaw

Migawas na si Ronald sa lawak nga nahimutangan ni Teresa. Midiretso siya sa main lobby sa Banlas Inn. Dihang mogawas na unta siya sa pultahan, kalit siyang napahunong. Nakita niya didto sa gawas ang sakyanan sa mga sundalo.

Midali si Ronald pag-ipli luyo sa pultahan. Unya mainampingon siyang milili ngadto sa gawas. Nasuta niya nga adunay duha ka sundalo nga nagbarog duol sa sakyanan. Pero mora’g walay tensiyon nga nahitabo sa gawas.

Apan gikulbaan gihapon si Ronald. Misantop sa iyang hunahuna sila si Ka Henry. Unsa man kahay nahitabo sa kauban niyang mga rebelde.

Nakahunahuna si Ronald nga dili maayong magpabilin siya sa iyang nahimutangan sa may main lobby. Mibalik siya ngadto sa kuwarto nga giokupar ni Teresa. Nakugang si Teresa nganong mibalik siya.

“Delikado,” niya pa. “May mga army sa gawas.”

“U-unsa?” Nakugang si Teresa. “Unsa may ilang gibuhat dinhi?”

“Ambot lang.”

“Dinhi ka lang.”

“Asa ka man?”

“Magsusi ko kun nganong dunay mga army sa gawas.”

“Ayaw na lang panguryoso. Tingalig dudahan ka.”

“Ayaw kabalaka. Ako’y bahala.” -- Sumpayan pa