Ang pangandoy ni Susan

Nagdamgo si Susan. Nakadaog siya sa jackpot sa Lotto, minilyon. Malipayon kaayo siya. Natuman na gyod ang iyang pangandoy nga makalingkawas sa kalisod uban sa iyang bana ug sa duha ka anak.

"Yahoo! Migawas na gyod ang akong gimintin nga mga numero sa Lotto! Dato na kami!"

Nahigmata si Susan sa kusog nga pag-uyog sa iyang bana sa iyang abaga. Nakalitan siya. Nanglugod sa iyang mga mata nga mibangon gikan sa gihigdaan nga sawog sa gamay nilang sala sa gipuy-ang eskuwater sa siyudad.

"Nagdamgo ka, Susan," matud ni Tikyo, bana ni Susan.

"Sus, abi ko’g tinuod. Tikyo. Haruhay na unta ta. Di na unta mag-antos ang atong mga anak sa kalisod sa pagpuyo." Nakapanglingo si Susan nga milingi sa iyang mga anak nga nagtupad sa pagkatulog sa usa ka bahin sa ilang sala.

Lalaki ug babaye ang ilang anak, nag-edad og singko ug tres.

"Unsa bay imong gidamgo, Susan?" Nangalot sa tingkoy si Tikyo.

"Ada, nakadaog kuno ko sa Lotto sa jackpot. Migawas kuno ang akong gimintin nga mga numero." Nanghupaw si Susan. "Pero damgo lang diay."

"Kun mao, biyai na ang pagpalit og Lotto labi na ang imong gimintin. Balit-ad ang damgo sa tinuod nga mahitabo. Di gyod mogawas ang imong gimintin nga mga numero." Tambag ni Tikyo sa asawa.

"Mao sab bitaw nay akong nadunggan sa namatay ko nang mga ginikanan. Mobiya na ko’g palit sa Lotto, uy, Tikyo, sukad karon."

Dalaga pa si Susan nga nangandoy nga maadunahan pinaagi sa pagdaog sa Lotto. Dugay na ang gimintin niyang mga numero sa Lotto. Sidewalk vendor si Susan sa siyudad. Ug dinhi niya ikaila si Tikyo nga namaligya sab sa aseras og bisan unsa sama sa sigarilyo, newspaper ug uban pa. Ug karon, nakadaog na unta siya sa Lotto pero di diay tinuod. Damgo lang diay.

"Basta, ha, Susan, di ka na mopalit og tiket sa Lotto?"

"O, lagi. Isaad ko kini."

Wa na gyod mopalit og tiket sa Lotto si Susan. Hingpit niyang gibiyaan ang gimintin niyang mga numero. Dako na siyag pilde niini pero mituo siya nga di gyod kini mogawas kay sukwahi gyod ang damgo sa tinuod nga mahitabo.

Nagtambayayong si Susan ug Tikyo sa pagpakabuhi sa aseras. Padayon nilang giantos ang kalisod. Pero malipayon ang ilang mga anak kay naningkamot man silang magtiayon nga mahatagan kini og hustong mga pagkaon ug biste.

"Di nalang ta mangandoy og sobra pa, Susan. Ang importante nga maayo ang atong lawas. Kun unsa ang ihatag nato sa Diyos, kinasingkasing nato ning dawaton," matud ni Tikyo usa ka higayon niana.

"Husto ka, Tikyo. Molihok lang ta aron mabuhi uban sa duha nato ka anak." Mipahiyom si Susan.

Naandan na ni Susan nga mobasa og Banat News matag buntag kun maninda na sila si Tikyo sa aseras. Ug karong buntaga, nagbasa si Susan sa maong mantalaan. Ug wa lang niya tuyoa nga nakatan-aw siya sa pahina diin mabutang ang resulta sa Lotto. Naniga ang iyang mga nga nagtan-aw sa mga numero nga migawas sa miaging gabii. Mikalit pagkusog ang pagbutukbutok sa ilalom sa iyang dughan. Naglisod siya sa pagginhawa.

"Tikyo, m-migawas ang akong mintin sa Lotto. Singkuwenta milyon ang premyo sa jackpot."

"H-Ha?" Igo lang misiga ang mga mata ni Tikyo sa kakugang. "Kaanugon."

"Waaa! Natuman na unta ang akong pangandoy! Natuman na unta!" Morag bata si Susan nga mingaab sa paghilak. (Kataposan)