Walay kamatayon ang gugma

Nasuta ni Jody nga mapugsanon kaayo si Randy. Dili gayod kini magpabalibad. Milingiw siya dihang iyang namatikdan nga gitan-aw sila si Randy sa guwardiya sa lobby sa Silver Star Daily. Dili siya gusto’g eskandalo maong gipahinuntan na lang niya si Randy.

“Asa mo ako dad-a?” Nangutana si Jody dihang nanakay na sila sa awto sa ulitawo.

“Sa dapit nga magkasulti kita’g maayo,” laktod nga tubag ni Randy.

Unya gipaandar ni Randy ang makina sa sakyanan. Walay timik silang duha sa dihang nagdagan na ang awto nga ilang gisakyan. Ang konsentrasyon ni Randy didto ra sa pagmaneho niini. Samtang si Jody ingon sa nablangko ang kaisipan.

Mihunong ang awto nga ilang gisakyan atubangan sa usa ka hotel nga nahimutang sa uptown sa dakbayan sa Sugbo. Kalit lang gikulbaan si Jody samtang giinspeksiyon pa sa security guard ang sakyanan.

“Nganong nia ko nimo dad-a dinhi?” Gipangutana ni Jody si Randy.

“Ayaw kabalaka,” ni Randy pa. “Wa koy daotang tuyo nimo. Gusto lang kong magkasulti ta’g maayo. Kanang walay makadisturbo nato.”

“Bantay ka lang gyud,” ni Jody pa.

Igo lang mipasiplat si Randy kaniya. Unya nakapahiyom ang ulitawo. - Sumpayan pa