Nakahigayon si Ronald pagpasabot og maayo sa iyang hinigugma nganong miabin siya sa mga rebelde. Gipatin-aw niya ngadto sa dalaga ang lintunganay niyang tumong. Dili alang sa iyang kaugalingong kabulahanan ang iyang gibuhat kundili alang sa masang Pilipino nga nahikawan sa hustisya ug kaangayan.
“Ang atong gugma?” Sukit ni Teresa.
“Panahon ray makatubag sa imong pangutana,” matud ni Ronald.
“Angay pa ba kong mulaom?”
“Anaa ra kana kanimo. Dili man sab ko gusto nga maglaom ka sa walay kasegurohan. Basta hinumdomi lang kanunay nga bisan magkina-unsa, mahal tikaw.”
“Gimahal ko usab ikaw, Ronald. Ikaw ray lalaki sa akong kinabuhi.”
Naggakos na usab sila. Gihagkan ni Ronald si Teresa. Unya, dihang milugad na ang ilang paggaksanay, nanamilit si Ronald sa dalaga.
“Kanus-a ta magkita pag-usab?” Pangutana ni Teresa.
Di pa ko makaseguro kun kanus-a,” ni Ronald pa. “Basta...motungha lang unya ko sa dili mo damhon nga higayon.”
“Huwaton ko ang imong pagbalik.” - Sumpayan pa