Anino sa adlaw

Gula 26

Nalipay si Ronald nga siya’y nakakutlo sa kaputli ni Teresa. Apan naglibog siya nganong gihimo kini sa dalaga sa dakong kasayon -- ang pagtugyan sa pagka-babaye niini kaniya. Nailhan niya si Teresa isip usa ka babaye nga hard-to-get. Unya karon...

“Nganong gitahan mo ang imong bandila kanako karon?” Sukit ni Ronald.

“Tungod kay nahadlok ko nga sa sunod natong panagkita dili na romantiko ang higayon,” tubag sa dalaga. “Karon nga nagpabukid ka na, wa nay kasegurohan kun may katumanan pa ba ang atong gugma. Mapatay man o madakpan ka sa kasundalohan, segurado nga maalaot ka. Mao nga nakahukom kong imatuod ko kanimo sa hingpit karon ang akong gugma. Bawona kini sa pagbalik mo sa bukid.”

Nalukmay ang kasingkasing ni Ronald sa gisulti ni Teresa. Nasuta niya nga gimahal gayod diay siya pag-ayo sa dalaga.

“Gihigugma ko usab ikaw, Teresa,” nagkanayon si Ronald. “Bawion man sa kahitas-an ang akong kinabuhi apan ibilin ko kanimo ang akong kasingkasing.”

Daw natukbil sa gisulti ni Ronald, migakos si Teresa kaniya. Gigakos usab niya kini’g hugot kaayo. Gihapuhap niya sa palad ang bukobuko sa babaye.

Dihang nag-ukang ang ilang panaggakos, lain na nga tema ang ilang gihisgotan. Nagpakisayod si Teresa sa iyang kahimtang sa bukid. Giingnan siya ni Ronald nga maayo ang iyang kahimtang didto sa kampo sa mga rebelde. -- Sumpayan pa