Walay kamatayon ang gugma
Wala motubag si Jody. Miduko siya sa atubangan sa iyang amahan.
“Si Randy Maglana ba kadtong imong gikasulti sa telepono?” Gikan na usab ni Mr. Garcia ang pangutana.
Yango ra’y gitubag ni Jody. Mitug-an siya sa tinuod. Nahadlok siyang mamakak sa iyang amahan kay tingali’g mabuking siya ug masuko na hinuon kini kaniya.
“Punyeta!” Mibuto sa kasuko si Mr. Garcia. “Dili ba giingnan ko na man ikaw nga likayi kanang tawhana? Nagsige pa ba diay kamo’g kita?”
“Gituman ko ang gusto mong mahitabo, Dad,” ni Jody nga kahilakon. “Gilikayan ko na si Randy. Wa na ko makigkita kaniya.”
“Nan, nganong nakigsulti ka man kaniya sa telepono?”
“P-pasayloa ko, Dad. Pero wa ko magdahom nga siya ang nanawag.”
“Huh!” Nagpaminti sa kalagot si Mr. Garcia. “Timan-i kini, Jody. Mahibaw-an ko gani nga nakigkita ka pa niadtong Randy Maglana, malintian ka gyud nako.”
Human sa ilang panagsulti, misulod si Jody sa iyang lawak. Didto wala na niya kapugngi ang iyang kaugalingon. Mihigda siya sa kama ug giumod ang iyang nawong sa unlan. Mihilak siya ug mihilak. Mibakho siya’g maayo aron ikapahungaw ang naghuot sa iyang dughan. - Sumpayan pa
- Latest
- Trending
