Anino sa adlaw

“Magsusi ta kun unsay hinungdan niadtong mga butobuto,” giingnan ni Ronald ang ilang mga kauban.

Wala mosanong sa gisugyot ni Ronald ang mga kauban niyang rebelde. Gipasabot siya ni Ka Henry nga dili na kinahanglang susihon nila ang hinungdan sa mga butobuto sa gamhanang mga armas nga ilang nabati.

“Walay gihimong operasyon karon ang atong pundok,” nagkanayon si Ka Henry. “Busa nakaseguro kong way kalabotan ang atong mga kauban sa kalihokan sa maong mga butobuto nga atong nadapit.”

“Kun mao, unsa man kahay hinungdan sa maong mga butobuto?” Sukit ni Ronald.

“Di ko makahatag nimo’g tukmang tubag, Ka Ronald. Mao lamay akong ikapadayag kanimo ang akong pagduda.”

“Pagduda nga unsa, Ka Henry?”

“Nga misugmat na sab ang sakit sa trigger-happy nga mga polis ug sundawo.”

“U-unsa?”

“Ingon niana ang uban kanila nga mga abusado. Magpataka lang og pabuto labina’g mahubog. Mangalisang intawon ang katawhan. Pero wa ta sa saktong posisyon sa pagpanginlabot niini karon. Manghinaot lang ta nga way sibilyan nga napagan sa maong mga butobuto.”

Ug mipadayon na sila paglakaw. Gipaspasan nila ang ilang mga lakang aron makaabot gilayon sila sa bukid nga ilang gikampohan. - Sumpayan pa