Kasinatian

Gula 4

Aron pagsuta kun si Chona ba gayud kadtong babaye nga nag-text sa atbang nga lamesa sa gilingkoran ni Berting, iyang gidayal ang numero niini ug giobserbahan kun unsay sunod mahitabo.

Tuod man, pag-ring na sa numero nga gidayal ni Berting, nakita niya nga kadtong babaye nga naglingkod sa atbang abtik nga mipunit sa iyang cell nga diha gibutang ibabaw sa lamesa.

Gi-end ni Berting ang call. Dayon nag-compose siya og text message aron ipadala kang Chona nga duol ra diay kaayo kaniya ning gabhiona.

Bisan og dili kaayo hayag ang suga sa bar, apan naklaro ni Berting nga maanyag g’yud tinuod si Chona. Naobserbahan usab niya basi sa iyang panglihok-lihok nga usa kini ka tomboy.

“Gikan mo diha sa Sanciangko’s Wildflower Chon, asa man mo paingon, Sabado man karon? Hapi-hapi ta, disco ta with your friends,” gitanyagan ni Berting si Chona isip una niyang lakang nga masuod ang tomboy.

Nakita ni Berting nga gipakita ni Chona sa iyang mga kauban ang message sa cellphone, dayon nadungog niya nga nagkasabot kini nga magdisco sila. “Sige laag ta ron basta ikaw ang bangka ha. Dali na!,” tubag ni Chona sa text ni Berting.

Wala na magdugay-dugay pa si Berting, mitindog siya ug giduol ang tulo ka babaye. Nagpaila dayon siya kang Chona nga siya si Berting. Mitupad paglingkod si Berting kang Chona nga mipaila-ila sa iyang duha ka kaubang babaye.

Nasabtan niya nga tomboy usab ang usa ka babaye ug ang kasikit niini iyang karelasyon. Nasabtan ni Berting nga walay partner si Chona niining gabhiona.

“Tana, manglakaw na ta. Ako na lay bayad sa inyong chit,” matud ni Berting nga mitawag dayon sa waiter. Tungod sa gihimo ni Berting nahimo siya nga daw dugay na nga suod sa mga babaye.

Sa diskohan nga ilang gisudlan dapit sa Salinas Drive, Lahug sila si Chona ug Berting ang nag-partner kay pares na mang daan ang duha nila ka kauban. Lingaw kaayo si Chona kay maayo usab mosayaw si Berting.

“Nindota nimo mosayaw uy Berting. Mawala man sab ang atong pagka boyish nimo ani. he. he,” matud ni Chona dihang mipahuway sila’g sayaw. Naobserbahan ni Berting nga daw nagkakusog na nga miinom si Chona sa beer.

Miorder pa og dugang beer si Berting para kanilang upat. Taud-taud, nananghid ang kauban nilang tomboy nga mouna na sila’g pauli kay ingon sa nahubog na ang babaye nga iyang partner.

“Ayoha nang akong Brod ha Berting,” nagkatawa nga mibilin og pulong ang laing tomboy kang Berting.

Hinay-hinay na nga milihok si Berting. Misikit siya paglingkod ni Chona ug giagbayan ang gwapa nga tomboy. (Sumpayan pa)